Петропавл қоғамдық кеңесінің мүшелері қаланың коммуналдық қалдықтарды басқару бағдарламасын сынға алды
Петропавлдың коммуналдық қалдықтарды басқару бағдарламасы қалалық қоғамдық кеңес отырысында таныстырылды, деп хабарлайды QZ Мedia тілшісі.
“Мансұр” ЖК басшысы Әділет Төлеуғалиев облыс орталығын қалай тазалау керектігі туралы айтып берді. Кәсіпорын қала әкімдігі ТҮКШ бөлімінің тапсырысы бойынша бағдарлама әзірледі. Оның құны 4 млн теңгеден асты.
“Коммуналдық қалдықтардың жалпы көлемін алсақ, шамамен 85% Петропавл қаласына тиесілі. СҚО бойынша ҚТҚ қайта өңдеу және кәдеге жарату көрсеткіші үш жылдың ішінде өзгермеді. Қазір 10% деңгейінде тұр. Халықтың коммуналдық қалдықтарын жинау және әкету жөніндегі негізгі кәсіпкерлік субъектілері “Петропавл Коммунхозы” ЖШС, “Коммун Север” ЖШС, “Таза Петропавл” ЖШС, “Мюль Сервис” ЖШС болып табылады. Бүгінгі таңда полигон толды деуге болады”, – деді “Мансұр” ЖК басшысы Әділет Төлеуғалиев.
Шаховское ауылының маңында орналасқан қалалық полигон аумағына жылына 53 мың тонна қоқыс түседі. Полигонның жобалық қуаты – шамамен 1,5 млн тонна. Қазір ол 90%-ға жуық толды, тек бірнеше жылдық орын қалды. Жергілікті билік ҚТҚ шығару үшін жаңа полигон салу мәселесін пысықтауда. Бірақ “Мансұр” ЖК басшысы мұндай шара тек уақытша нәтиже береді деп санайды.
“Коммуналдық қалдықтарды жинау және тасымалдау жүйесін одан әрі дамыту, ҚТҚ шығару қызметтерінің сапасын арттыру үшін қоқыс өңдеу зауыттарын ашу қажет”, – деді Әділет Төлеуғалиев.
Әділет Төлеуғалиев қоқыс өңдеу зауытын кім және қалай салу керектігін айтқан жоқ. Коммуналдық қалдықтарды басқару бағдарламасында қоқысты шығару үшін жүйелі түрде ақша төлемейтіндерге, сондай-ақ қоқыс шығаратын компанияларда арнайы көліктің жетіспеушілігіне үлкен көңіл бөлінеді. Осыған байланысты олардың барлығы өз міндеттерін адал орындай бермейді. Бейінді кәсіпорындардың өкілдері борышкерлермен жұмыс істеуі керек, олар өздерінің автопарктерін жаңартумен айналысуы керек, дейді Галина Семенова.
“Халық бірдей қызметтерді алуы керек. Тариф барлығына бірдей, егер бір компания адал қызмет көрсетсе, онда онымен байланысты нығайту қажет, ол өз мүмкіндіктерін кеңейтсін”, – деп атап өтті қалалық қоғамдық кеңестің мүшесі Галина Семенова.
Жаңа бағдарламаның тұсаукесері кезінде “Мансұр” ЖК басшысы қоқыс шығару тарифін көтеру қажеттігі туралы айтты. Өткенге үңілейік. Тариф Петропавлда 2017 жылдан бастап көтерілген жоқ, тек 2023 жылдың жазында 220 теңгеден 480 теңгеге дейін арттырды. Қалалық қоғамдық кеңес мүшелерінің спикерге көп сұрағы болды, ол бәріне бірдей жауап бере алмады. Әділет Төлеуғалиев қаланың коммуналдық қалдықтарды басқару бағдарламасын іске асыру үшін қанша қаражат қажет екенін де түсіндірмеді.
Ол 2024-2027 жылдарға арналған деп болжануда. Бағдарлама қаладағы экологиялық жағдайды қаншалықты жақсартады? “Мансұр” ЖК басшысы бұл сұраққа да жауап берген жоқ. Спикер елорданың сарапшылары онымен жұмыс істегенін айтты. Сөз сөйлеу барысында басшы қала мен облыстың статистикасын араластырды, бұл да қоғамдық кеңес мүшелерінің шатасуына себеп болды. Олардың кейбіреуінің пікірінше, бағдарламаның тұсаукесері бұлыңғыр және түсініксіз болып шықты, сондықтан оны нақтылау қажет.