Қазақстандық танымал жүргізуші Максим Касперович қайтыс болды

39 жасында елімізде танымал жүргізуші Максим Касперович қайтыс болды, деп хабарлайды QZ Мedia тілшісі. Қолда бар деректерге сүйенсек, өлімнің себебі – тромбтың үзілуі.

Максим Касперович 1985 жылы 14 қазанда дүниеге келген. Оның жүргізушілік жолы 2003 жылы басталды. Ол бұқаралық- спорттық іс-шаралар мен тимбилдингтер жүргізді, клубтарда жұртшылықтың көңілін көтерді, туған күндерді, үйлену тойларын өткізді.

Сондай-ақ, “Хабар”, “1 Северный”, “Магия Кухни”, МТРК телеарналарында тележүргізуші, сонымен қатар, Ретро FM Qazaqstan, “Феличита”, Energy FM “Васаби Шоу”-дың радиожүргізушісі болып жұмыс істеді.

Сондай-ақ, Ш.Айманов атындағы “Қазақфильм”-нің мюзикл және кино актері болды, Russian Shomen Week қатысушысы, Ресей мен Қазақстан жүргізушілеріне арналған үздік мектептердің резиденті және “Хабар” арнасында жарық көрген “Мен Чемпион” және “Мен Чемпион PRO” бағдарламаларын жүргізді.

Марқұмды жерлеу рәсімі 28 ақпанда Петропавлда өтеді.

QZ Media редакциясы Максим Касперовичтің отбасы мен жақындарына қайғыра көңіл айтады.