СҚО-да үздік қосымша білім беру педагогы таңдалады

Петропавлда қосымша білім беру мамандары арасында “Жыл педагогы” атты облыстық байқау өтті, деп хабарлайды QZ Мedia тілшісі.

Байқауға Петропавлдағы, Қызылжар, Ақжар және Ғ. Мүсірепов ауданындағы балалар өнер мектептерінің, көркемсурет мектептерінің, бейнелеу өнері студияларының және жалпы білім беретін мектеп студияларының 10 педагогы қатысты.

“Бүгін біздің педагогтар білген-түйгендерін көрсете алады, сондай-ақ тәрбиеленушілерінің жетістіктерін ұсына алады. Байқау екі кезеңде өтеді. Біріншісі – қашықтықтан. Онда мұғалімдер өз сабақтарын ұсынды. Ал келесі кезеңде мамандар қазылар алқасына өздері әзірлеген презентацияны таныстырады, шығармашылық тапсырманы орындайды”, – деді облыстық балалар мен жасөспірімдер шығармашылық орталығы директорының орынбасары Ирина Колодаева.

Анастасия Глухих байқауға Қызылжар ауданынан келді. Ол 10 жылдан бері Бескөлдегі “Мерей” өнер мектебінде жұмыс істейді.

“Менде бірнеше топ бар. Балалармен әртүрлі жұмыстарды әзірлейміз, жаңа әдістерді қолданып көреміз, бұрынғыларын шыңдаймыз. Балалар конкурстарға белсенді қатысады. Мен дамуға, жасауға, шабыттандыруға, үйретуге қызығамын”, – деді “Мерей” өнер мектебінің мұғалімі Анастасия Глухих.

“Жыл педагогы” байқауының жеңімпаздары түрлі марапатқа ие болады.