Петропавлда 100 мұқтаж отбасыға азық-түлік себеті таратылды

“Зекет” қайырымдылық қоры мен “Қызылжар” облыстық орталық мешітінің өкілдері 100 отбасыға “Рамазан қоржыны” азық-түлік себетін таратты, – деп хабарлайды QZ Мedia тілшісі.

“Рамазан – жақсы істер айы. Отбасыларға көмек көрсетіп жатқан мешіт пен “Зекет” қорына алғыс білдіремін”, – деді Петропавл қаласының тұрғыны Ақбөпе Шуханова.

“Зекет” қоры көптеген жылдар бойы мұқтаж адамдарға көмектесіп келеді. Біреу қаржылық көмек сұрайды, кейбіреуіне азық-түлік, отын және басқалары қажет болады.

“Біздің қорда адамдар ақша жіберетін арнайы шот бар. Жиналған ақшаға осындай қайырымдылық акцияларын өткіземіз. Сондай-ақ бізде “Өмірге үміт сыйла” акциясы өтеді. Оның көмегімен  балаларға көмектесеміз, емделуге ақша жинаймыз”, – деді “Зекет” қорының өңірлік өкілі Қасымхан Исаев.

Айта кетейік, көмекке мұқтаж облыс тұрғындары кез келген мешітке жүгіне алады.

“Біздің мешіт әрқашан қайырымдылықпен айналысады, тек қасиетті Рамазан айында ғана емес, үнемі көмек береміз. Бірақ қасиетті айда бұл қайырымдылық саны екі есе артады. Жақсылық жасау – Алла тағаланың алдында үлкен және игі әрекет. Сондықтан, осы қасиетті айда мүмкіндігінше игі істер жасауға шақырғым келеді”, – деді “Қызылжар” облыстық мешітінің бас имамы Хамзат Әділбеков.