Петропавлда бесбармақ дайындау бойынша шеберлік-сабағы өтті

Қазақстан халқы Ассамблеясының облыстық мүшелері Наурыз мерекесі аясында бесбармақ дайындау бойынша шеберлік-сабағын өткізді, деп хабарлайды QZ Мedia тілшісі.

Шеберлік-сабағы барысында қатысушылар дәстүрлі бесбармақ тағамын дайындаудың құпияларымен танысты, ыстық шай мен енді ғана піскен бауырсақтың дәмін татты.

“Біз этномәдени бірлестіктердің, қоғамдық ұйымдардың және оқушылар арасынан өкілдерді шақырдық. Алғаш рет өткізіп отырмыз, іс-шараның дәстүрге айналғанын қалаймыз”, – деді “Қоғамдық келісім” КММ сарапшысы Айым Мұқышева.

Шеберлік-сабағына 24 адам, сондай-ақ мектеп оқушылары қатысты. Олар дұрыс пісірудің және бесбармақты дұрыс ұсынудың қыр-сырын ұғынды.

“Бесбармақ дайындай аламын, қонақтарым әрқашан менің тағамым дәмді болатынын айтады. Жас кезімде дайындауда қателіктер болды, бірақ олар уақыт өте жойылды”, – деді Қозыбаев университеті “Қазақстан халқы Ассамблеясы” кафедрасының меңгерушісі Людмила Гривенная.