Қозыбаев университеті мен Қр Ұлттық Ұлан Академиясы ұлттық тағамдарды таныстырды

Петропавлда Қозыбаев университетінің студенттері мен ҚР Ұлттық ұлан Академиясының курсанттары арасында «Наурыз – достық мерекесі!» атты байқау өтті, деп хабарлайды QZ Media тілшісі.

Қатысушылар 5 командаға бөлінді. Әрқайсысы 6 адамнан тұрды. 3 команда – университеттен, 2 команда – ҚР Ұлттық ұлан Академиясынан. Байқау алдында жеребе тартылды. Сол бойынша шара аясында таныстырылатын ұлттар анықталды.

Толығырақ айтайық. Әр топ түрлі ұлт өкілдерінің мәдениетін, әдет – ғұрыпын, ең бастысы – ұлттық тағамдарын таныстырды. Командалар қазақ, армян, өзбек, қытай және орыс ұлтының тағамдарын ұсынды.

Білім алушылар тағамдарды ЖОО-ның азық-түлік технологиясы зертханасының базасында алдын ала дайындаған. Жарысқа Агротехнологиялық факультетінің «Азық-түлік қауіпсіздігі» кафедрасының студенттері және Ұлттық ұлан Академиясы қатысты.

“Жоғары оқу орындарының профессорлық-оқытушылар құрамы мен қызметкерлерінің ішінен қазылар алқасы тағамның дәмін және өзіндік ерекшелігін, санитарлық-гигиеналық нормалардың талаптарына сәйкестігін бағалады. Жеке тағамдардан басқа, әр команда шығыс тәттісін «чак-чак» дайындап, оны ұсынылған ұлттық тағамдардың мәзіріне біріктірді”, – делінген ЖОО хабарламасында.

Сонымен қатар, қыз-жігіттер шығармашылық қабілеттерін музыкалық үй тапсырмасын орындау арқылы көрсетті. Байқаудың үздіктері ЖОО-ның қытай мәдениетін ұсынған ТПП-21 тобының студенттері болды. Олар гран-при мен 20 000 теңге алды. ТПП-23-к тобының білім алушыларына бірінші орын бұйырды. «Күмісті» Ұлттық Ұлан Академиясының командасы, ал «қоланы» ТПП-21-к тобы жеңіп алды. Барлық жүлдегерлер мен жеңімпаз дипломдармен марапатталды.