Петропавлда басталған «Auyl sport -2024» облыстық лигасында 200 спортшы күш сынауда

Петропавлда «Auyl sport -2024» облыстық лигасы басталды. Сайысқа Солтүстік Қазақстан облысының барлық аудандарынан келген 200-ге жуық спортшы қатысуда, деп хабарлайды QZ News тілшісі.

“Бұл – жаңа турнир. Әр облыста іріктеу жарыстары өткізіледі, ал желтоқсанда Алматыда финалдық кезең өтеді. Жеңімпаздар ақтық сынға «Halyk» қайырымдылық қорының есебінен барады. Іріктеу жарыстарына демеушілік жасалады, сондықтан біздің спортшыларға әр спорт түрі бойынша сыйлықтар, чемпиондық белдіктер, медальдар мен спорттық киімдер дайындалды”, – деді СҚО бойынша “Auyl sport -2024” жобасының үйлестірушісі Дәурен Нұрғожин.

Жарыс спорттың 6 түрі бойынша өтеді: карате, шахмат, волейбол, еркін күрес, бокс және баскетбол.

“Ұйымдастыру өте ұнады. Біздің ауданнан әр спорт түрі бойынша 12 адамнан тұратын ерлер мен әйелдер командалары келді. Мен баскетболмен 4 жыл айналысамын. Аудандық деңгейде жоғары нәтижелерге қол жеткіздім”, – деді Мамлют ауданының Меңкесер орта мектебінің оқушысы Асылмұрат Мұхаметқалиева.