Петропавлдағы бірнеше балабақшада отандық конструктордың көмегімен робототехника оң жолға қойылған

Алматыдағы зауытта жасалатын конструктор мектепке дейінгі ұйым педагогтарының халықаралық форумы аясында ұйымдастырылған көрмеде таныстырылды. Ол робототехникамен айналысуға арналған, деп хабарлайды QZ News тілшісі.

«FOUR ANGELS» компаниясы филиалының директоры Виталлина Смолянина балабақшаларда отандық өндірістегі конструкторға сұраныс аса жоғары екенін айтты. Петропавлда оның көмегімен 3-7 жас аралығындағы балаларға арналған робототехника сабақтары өтуде.

“Өнімді тапсырыс арқылы сатамыз, сонымен қатар оны электронды сауда алаңдарынан табуға болады. Компания Алматыда 4 жыл бұрын ашылды, Петропавлда бірінші филиал ашылып отыр, бір ай жұмыс істеп жатырмыз. Облыс орталығындағы балабақшаларда робот техникасы бойынша тегін сынақ сабақтарын өткіземіз, ол үшін бізде оқытылған педагогтар бар. Қазір бірнеше қалалық мектепке дейінгі ұйыммен ынтымақтасып жатырмыз. Конструктордың бір жинағынан 500-ге дейін қолдан жасалған туынды әзірлеуге болады. Сабақтар ұсақ моториканы, есте сақтауды, қиялды және ойлауды дамытады”, – деді “FOUR ANGELS” компаниясы филиалының директоры Виталлина Смолянина.