Петропавлда жас тарихшылардың облыстық конференциясы өтуде

Петропавлда Сәбит Мұқанов атындағы № 32 орта мектептің қабырғасында жас тарихшылардың I облыстық ғылыми-тәжірибелік конференциясы өтуде, деп хабарлайды QZ News тілшісі.

Конференцияда барлық қатысушыға өз жұмыстарын таныстыру, туған өлкесінің тарихы мен мәдениетінің өзекті тұстарын ашу, өңірдің даму жоспарын талқылау мүмкіндігі берілді.

“Конференцияға аудандардан келген және жергілікті мектеп оқушылары мен тарих мұғалімдері қатысуда. Конференция 4 секцияға бөлінген. Алғашқы екі секцияда оқушылар төбе көрсетеді. Біз үздіктерді анықтаймыз, олар дипломмен марапатталады. 3-4 секция мұғалімдердің баяндамасына бөлінген”, – деді конференцияның модераторы, Сәбит Мұқанов атындағы № 32 орта мектептің тарих мұғалімі Ольга Волкова.

Конференцияның бірінші секциясы СҚО-ның киелі жерлеріне арналған. Бұл бағытта оқушылар 12 баяндама жасайды. Ал екінші секция Қазақстанның жаңа тарихына арналған, мұнда оқушылар 14 баяндама ұсынады. Конференция жұмысы мұғалімдердің қорытынды сөздерімен аяқталады.