Эстонияның Қазақстан Республикасындағы Елшісі Яап Ора Қозыбаев университетінің басшылығымен және студенттерімен кездесті

Қозыбаев атындағы университетке Эстония Республикасының Қазақстан Республикасындағы Елшісі Яап Ора келді. Ол университет басшылығымен кездесіп, студенттерге ашық дәріс оқыды, деп хабарлайды QZ News тілшісі.

Яап Ора студенттерге Эстонияның тарихы, мәдениеті, білімі, сондай-ақ Орталық Азия елдерімен ынтымақтастық маңызды рөл атқаратын сыртқы саясатының бағыттары туралы айтып берді.

«Тәуелсiздiктi сақтап, басқа да тәуелсiз мемлекеттермен, халықаралық ұйымдармен ынтымақтастықта ғана дамуға болады. Біз Қазақстанмен халықаралық құқықтың үстемдігі қағидатын бөлісеміз және одан әрі ынтымақтастыққа дайынбыз», – деп атап өтті Эстонияның Қазақстан Республикасындағы Елшісі.

Басқарма төрағасы – Қозыбаев университетінің ректоры Ербол Исақаев та өз кезегінде Эстония Республикасының жоғары оқу орындарымен байланыс орнатуға, мәдени алмасуды жүзеге асыруға, бірлескен ғылыми және академиялық жобаларды жүзеге асыруға дайын екенін жеткізді.

«Сіздердің қолдауларыңызбен Эстонияның ғалымдарымен, оқытушыларымен және ІТ орталықтарымен жақсы қарым-қатынас орнатамыз деп үміттенеміз», – деді кездесуде Басқарма төрағасы – Қозыбаев университетінің ректоры Ербол Исақаев.