Канададағы мектептегі атыс кезінде 10 адам қаза тауып, тағы 25 адам зардап шекті

Канаданың Тамблер-Ридж қаласындағы мектепте атыс болды – салдарынан адамдар қаза тауып, жарақат алған. 10 адамның қаза тапқаны туралы ақпаратты полиция растады, деп хабарлайды QZ NEWS NUR.KZ-ке сілтеме жасап.

Канадалық CBC басылымының мәліметінше, алты адам орта мектеп ғимаратының ішінде өлі күйінде табылған, бір адам ауруханаға бара жатқан жолда көз жұмған, тағы екеуі тұрғын үйден өлі күйінде анықталған. Тергеу нұсқасына сәйкес, мектеп пен үйдегі оқиғалар өзара байланысты.
Күдікті де мектеп ішінде өлі күйінде табылған.

Полицияның болжамынша, ол өз-өзіне қол жұмсауы мүмкін.
Екі адам ауыр жарақатпен әуе көлігі арқылы ауруханаға жеткізілді.
Сондай-ақ 25 адам жергілікті медициналық орталықта жарақат алу фактісі бойынша тексеруден өтуде. Оқиға орнынан шамамен 100 адам эвакуацияланды.

Полиция құпиялылық талаптарына байланысты шабуыл жасаған адамның жасын жариялаған жоқ.