Петропавлда компьютерлік ойындар әзірлеуге арналған ауқымды BOOTCAMP өтуде
Петропавлдағы SKO Hub алаңында GAMEDAV BOOTCAMP атты бес күндік білім беру интенсиві өтуде. Іс-шара Солтүстік Қазақстан облысының түкпір-түкпірінен келген оқушыларды, жастарды және ІТ-мамандарды біріктірді, деп хабарлайды QZ NEWS тілшісі.
Қатысушылар ойын индустриясындағы жетекші сарапшылардың жетекшілігімен тәжірибелік білім алуда. Менторлар қатарында Алматыдағы SHŪ Studio гибридті студия-баспасының өкілдері мен халықаралық Astana Hub ІТ-стартаптар технопаркі жанындағы GameDev Center мамандары бар.
«Интенсив бағдарламасы геймдизайн, сценарий жазу, кейіпкерлер жасау және танымал әзірлеу құралдарымен жұмыс істеу бағытындағы заманауи құзыреттерді дамытуға арналған. Буткемпке 12 жастан асқан балалар мен жасөспірімдер, жаңадан бастаған әзірлеушілер, сондай-ақ Солтүстік Қазақстан облысындағы аудандық ІТ-орталықтардың қызметкерлері белсенді қатысуда. Спикерлер мен тәлімгерлер ретінде танымал қазақстандық мамандар Малика Игібаева, Элина Ким және Матвей Сеселкин шақырылды», – деп атап өтті SKO Hub өкілдері.
Воркшоптар барысында қатысушылар ойын индустриясындағы мамандықтармен танысып, Unreal Engine 5 платформасында 3D-әзірлеудің негіздерін және GameMaker бағдарламасында екі өлшемді ойындар жасауды меңгеруде.
Бір апталық оқытудың негізгі нәтижесі ретінде қатысушылар өздерінің авторлық ойын жобаларын әзірлеп, көпшілік алдында таныстырады. Ал аудандық ІТ-орталықтардың қызметкерлері алған білімдері мен әдістемелерін өңірлерде профильдік білім беру бағдарламаларын іске қосу үшін пайдалануды жоспарлап отыр. Бұл өз кезегінде Солтүстік Қазақстан облысының барлық аудандарында геймдев индустриясын дамытуға мүмкіндік береді.