Петропавлдық танымал дәрігер-невропатолог Елена Орлова өмірден өтті
Петропавл қаласындағы №1 қалалық емхана ұжымы 2026 жылғы 25 маусымда мамандандырылған көмек бөлімшесінің дәрігер-невропатологы Елена Геннадьевна Орлованың өмірден озғанын хабарлады, деп жазады QZ NEWS тілшісі.
Елена Орлова 1966 жылдың 24 сәуірінде Петропавл қаласында дүниеге келген. 1990 жылы Целиноград мемлекеттік медицина институтын «Емдеу ісі» мамандығы бойынша тәмамдаған. 1991 жылдың шілде айында облыстық аурухана базасында интернатураны аяқтағаннан кейін №1 қалалық емханада дәрігер-невропатолог болып үздіксіз еңбек етті.
Елена Геннадьевна өңір тұрғындарының денсаулығын сақтауға 30 жылдан астам ғұмырын арнап, жоғары білікті маман ретінде танылды. Көп жылғы адал еңбегі үшін денсаулық сақтау саласының алғыс хаттары мен құрмет грамоталарымен бірнеше рет марапатталған.
Әріптестері мен пациенттері оны кәсіби шеберлігі жоғары, адамгершілігі мол, мейірімді әрі жанашыр жан ретінде білді. Ол жас мамандарға әрдайым қолдау көрсетіп, тәжірибесімен бөлісуден ешқашан жалыққан емес.
№1 қалалық емхана ұжымы Елена Геннадьевнаның туған-туыстары мен жақындарына қайғырып көңіл айтады.
Оның жарқын бейнесі әріптестерінің және мыңдаған алғысқа толы пациенттерінің жүрегінде мәңгі сақталады.