СҚО-да БАҚ қызметкерлері күні аталып өтті
Солтүстік Қазақстан облысында Бұқаралық ақпарат құралдары қызметкерлері күні салтанатты түрде аталып өтті, деп хабарлайды QZ NEWS тілшісі.
Бұл күні құттықтауларды тек журналистер ғана емес, редакциялар, баспаханалар, теле және радио компанияларының үздіксіз жұмысын қамтамасыз етіп жүрген сала мамандары да қабылдады. Дизайнер-беттеушілер, баспагерлер, дыбыс режиссерлері, монтажерлер, редакторлар, бұқаралық ақпарат құралдарының басшылары және өзге де медиа саласы қызметкерлері лайықты марапаттарға ие болды.
Медиа қауымдастық өкілдерін кәсіби мерекемен Солтүстік Қазақстан облысының әкімі Ғауез Нұрмұхамбетов құттықтады. Ол бүгінгі таңда журналистерге ерекше жауапкершілік жүктелгенін атап өтіп, олардың халықты шынайы әрі объективті ақпаратпен қамтамасыз етуде, ашық қоғамдық диалогты дамытуда және мемлекет пен қоғам арасындағы сенімді нығайтуда маңызды рөл атқаратынын айтты.
«Журналистердің күнделікті еңбегі азаматтарды объективті әрі сенімді ақпаратпен қамтамасыз етіп, қоғам мен мемлекет арасындағы өзара сенімді нығайтуға ықпал етеді. Барлық бұқаралық ақпарат құралдары қызметкерлеріне кәсібилігі, объективтілігі, ұстанымға беріктігі және өз ісіне деген жауапкершілігі үшін шынайы алғысымды білдіремін», – деді өңір басшысы.
Салтанатты шараның басты оқиғасы – Солтүстік Қазақстан облысының екі БАҚ қызметкеріне жаңа пәтердің кілтін табыстау болды. Баспаналар Мемлекет басшысының тапсырмасы аясында беріліп, отандық бұқаралық ақпарат құралдары өкілдеріне көрсетіліп отырған қолдау мен қамқорлықтың айқын көрінісіне айналды.
Жалпы мереке күні ақпарат саласының 59 қызметкері марапатталды. Көп жылғы адал еңбегі, жоғары кәсіби шеберлігі және отандық журналистиканың дамуына қосқан үлесі үшін оларға мемлекеттік және ведомстволық наградалар, Құрмет грамоталары, Алғыс хаттар мен естелік мүсіншелер табысталды.
«Северный Казахстан» баспасы» ЖШС-нің директоры Иван Моор жоғары мемлекеттік награда – «Парасат» орденімен марапатталды. Бұл марапат оның баспа ісі мен өңірлік журналистиканы дамытуға қосқан көпжылдық елеулі еңбегінің жоғары бағасы болды.
Сондай-ақ облыс әкімі солтүстікқазақстандық журналистердің республикалық деңгейдегі жетістіктеріне де тоқталды. Кәсіби мереке қарсаңында облыстық «Soltüstık Qazaqstan» газетінің қоғамдық-саяси бөлімінің жетекшісі Өмір Есқали Президенттің қолынан «Құрмет» орденін алды.
Ресми бөлімнен кейін іс-шара жылы әрі еркін жағдайда жалғасты. Бұқаралық ақпарат құралдарының қызметкерлеріне арналған фуршет ұйымдастырылып, редакциялар, теле және радио компанияларының өкілдері өзара және облыс басшылығымен еркін пікір алмасты. Бейресми кездесуде кәсіби мәселелер, өңірлік медианың дамуы, жаңа жобалар мен ақпарат саласының келешегі талқыланды.
Мерекелік кездесу үздік мамандарды марапаттаумен ғана шектелмей, өңірдің ақпараттық кеңістігін күн сайын қалыптастырып жүрген барлық мамандарға – журналистерге, операторларға, монтажерлерге, дизайнерлерге, беттеушілерге, баспагерлерге және өзге де медиа саласы қызметкерлеріне ризашылық білдіруге мүмкіндік берді. Олардың еңбегі қазіргі заманғы медиасфераның ажырамас бөлігі болып қала береді.