Петропавлда мерейтойлық QYZYLJAR MUSIC FEST фестивалінде Италия мен Қазақстанның өнерпаздары өнер көрсетеді

5-10 шілде аралығында Петропавл тағы да өңірдегі басты музыкалық оқиғаның орталығына айналады. Қаланың Орталық алаңында биыл КСРО халық әртісі, көрнекті опера әншісі Ермек Серкебаевтың 100 жылдығына арналған бесінші халықаралық QYZYLJAR MUSIC FEST фестивалі өтеді, деп хабарлайды QZ NEWS тілшісі.

Солтүстік Қазақстан облысының мәдени өмірінің брендіне айналған жоба жыл сайын мыңдаған көрерменді жинап, классикалық дәстүрлер мен заманауи өнерді тоғыстырып келеді.

Ашық аспан астында өтетін алты ерекше кеш облыс орталығының тұрғындары мен қонақтарына үлкен шығармашылық мерекенің атмосферасын сыйлайды. Күн сайын сағат 19:00-де қаланың басты алаңы түрлі музыкалық бағыттар, мәдениеттер мен ұрпақтарды тоғыстыратын ауқымды концерт алаңына айналмақ.

Мерейтойлық фестиваль бағдарламасы жанрлық әртүрлілігімен ерекшеленеді. 5 шілдеде өтетін салтанатты ашылу этникалық музыка кешімен басталады. Оның басты қонағы ұлттық дәстүр мен заманауи әуенді үйлестірген әйгілі Hassak фольклорлық-этнографиялық ансамблі болмақ.

6 шілдеде көрермендерді заманауи би өнерінің кеші күтеді. Арнайы қонақ ретінде халықаралық Red Bull Dance Your Style жобасының финалисі Руфина Карева өнер көрсетеді. Ал 7 шілдеде жастарға арналған диджейлер баттлы ұйымдастырылып, заманауи музыкалық әуендер мен жарқын шоуы ұсынылады.

Фестивальдің ең ерекше кештерінің бірі 9 шілдеде өтетін ашық аспан астындағы классикалық музыка концерті болмақ. Солтүстікқазақстандық көрермендердің алдында Қазақстанның еңбек сіңірген қайраткері Зарина Алтынбаева өнер көрсетсе, бағдарламаның арнайы қонағы ретінде танымал италиялық опера әншісі Анджело Форте қатысады.

10 шілдеде мерекенің шарықтау шегі – гала-концерт өтеді. Онда қазақстандық танымал орындаушы Alem өзінің ең танымал хиттерін орындайды.

Ұйымдастырушылар Петропавл тұрғындары мен қала қонақтарын жаздың жайма-шуақ кештерін жоғары өнер мен жылы жүздесуге толы ерекше атмосферада өткізуге шақырады.