Тимирязев ауданының тұрғыны шұғыл түрде МИ-8 тікұшағымен кардиоорталыққа жеткізілді
Солтүстік Қазақстан облыстық жедел медициналық жәрдем орталығының санитарлық авиация бөлімшесі «Қазавиақұтқару» АҚ-мен бірлесіп, МИ-8 тікұшағын пайдалана отырып әуе рейсін жүзеге асырды. Әуе көлігі Тимирязев ауданынан пациентті тасымалдау үшін тартылды, деп хабарлайды QZ NEWS тілшісі.
Шұғыл эвакуация 1953 жылы туған, ауыр жүрек-қантамыр жүйесі дертіне шалдыққан әйелге қажет болды. Науқасты Петропавл қаласындағы облыстық кардиологиялық орталыққа ауыстыру үшін сұраныс Тимирязев аудандық ауруханасынан түскен.
Тікұшақты пайдалану науқасты жеткізу жеделдігін едәуір арттырып, оның өміріне төнетін қауіп-қатерді барынша азайтуға мүмкіндік берді.
Облыстық жедел жәрдем орталығының медицина қызметкерлері мен авиация саласы мамандарының өзара іс-қимылы Солтүстік Қазақстан облысының ең шалғай елді мекендерінде тұратын тұрғындарға жоғары білікті медициналық көмектің қолжетімділігін қамтамасыз етуге бағытталған.