Солтүстік Қазақстан облысы 90 жылдық мерейтойын атап өтуде

Солтүстік Қазақстан облысы өзінің 90 жылдық мерейтойын атап өтуде. Осы тарихи датаға орай өңір тұрғындарын облыс әкімі Ғауез Нұрмұхамбетов құттықтады, деп хабарлайды QZ NEWS тілшісі.

1936 жылғы 29 шілдеде Солтүстік Қазақстан облысы құрылды. Тоғыз онжылдық ішінде өңір қалыптасу мен даму жолынан абыроймен өтті. Облыс әкімінің айтуынша, өңір тарихы – ең алдымен туған жеріне адал, еңбекқор, рухы мықты жандардың тарихы.

«Облыс экономикалық әлеуетін нығайтып, ауқымды инвестициялық жобаларды жүзеге асырып, инфрақұрылымды дамытып, халықтың жайлы өмір сүруіне қолайлы жағдай жасап, нық қадаммен алға басып келеді. Өңірдің барлық жетістігі – тұрғындардың бірлескен еңбегінің, кәсібилігінің, жауапкершілігінің және туған жерге деген шынайы сүйіспеншілігінің нәтижесі», – деп жазды Ғауез Нұрмұхамбетов өзінің Telegram-арнасында.

Өңір басшысы ардагерлерге, барлық сала еңбеккерлеріне, кәсіпкерлерге, қоғам белсенділеріне және жастарға өңірдің гүлденуіне қосқан сүбелі үлесі үшін ерекше алғысын білдірді.

Құттықтау сөзінің соңында облыс әкімі барлық солтүстікқазақстандықтарға зор денсаулық, отбасыларына амандық, елге тыныштық пен береке, ал Солтүстік Қазақстан облысына тұрақты даму мен жаңа жетістіктер тіледі.