Қанша қазақстандық аптасына бес күн жұмыс істегенді жөн көреді

Жалақы мөлшерінен бөлек, қазақстандықтар үшін жұмыс кестесі мен форматы да маңызды. Сонымен қатар, қызметкерлердің жартысынан көбі дәстүрлі бес күндік жұмыс аптасын қалайды, деп хабарлайды QZ News NUR.KZ-ке сілтеме жасап.

Жұмыс іздегенде азаматтар жалақы мөлшері, үйден қашықтығы, ресми жұмысқа орналасу мүмкіндігі, сондай-ақ жұмыс кестесі мен форматы сияқты түрлі факторларға назар аударады.

HeadHunter сарапшыларының шамамен 1 600 респондентті қамтыған зерттеуіне сәйкес, көптеген қазақстандықтар үшін ең қолайлысы — аралас (гибридті) жұмыс форматы. Бұл нұсқаны сұралғандардың 40%-ы таңдаған.

Аралас формат онлайн жұмыс істеуді қамтиды, бірақ офлайн режимін де жоққа шығармайды және әріптестермен тікелей байланыс жасауға мүмкіндік береді.

Тағы 36% тек қашықтан жұмыс істеуді қалайды. Бұл формат ыңғайлы, себебі адам өзіне қолайлы кез келген жерден — тіпті кофехана немесе басқа елден де — жұмыс істей алады.

Қазақстандықтар үшін қолайлы жұмыс кестесінің басқа түрлері ретінде ауысыммен жұмыс істеу (26%) және вахталық әдіс (17%) аталды. Айта кету керек, респонденттер бірнеше нұсқаны қатар таңдауға мүмкіндік алды.

Ал жұмыс күндеріне келсек, Қазақстанда төрт күндік жұмыс аптасына көшу мүмкіндігі болса да, азаматтардың көпшілігі (53%) әлі де дәстүрлі 5/2 кестесін — бес жұмыс және екі демалыс күнін — таңдаған.

38% еркін кестемен жұмыс істегенді қалайды, ал шамамен 31% «екі күн жұмыс — екі күн демалыс» тәртібін ыңғайлы деп есептейді. Қызығы, 17% «15 күн жұмыс — 15 күн демалыс» режимін таңдаған, ал тағы 4% сирек кездесетін басқа нұсқаларды таңдаған.

Жұмыс шарттарының басқа аспектілері, мысалы, артық жұмыс істеу туралы айтқанда, 76% азамат бұған қарсы емес екенін айтты, бірақ тек ол үшін қосымша ақы төленсе ғана.

Көпшілік еркін кестені қалағанымен, респонденттердің басым бөлігі таңғы (34%) және күндізгі (32%) уақытты ең өнімді сағаттар деп санайды. Сонымен қатар, 45% адам өнімділік уақытқа емес, тапсырмалар мен апта күндеріне байланысты екенін атап өтті.