Солтүстік Қазақстан облысының тұрғындарына жаз мезгілінде ішек инфекцияларының көбею қаупі туралы ескертілді
СҚО Өңірлік коммуникациялар қызметінде Көпбейінді облыстық балалар ауруханасының инфекциялық бөлімінің меңгерушісі Елена Коптяева жіті ішек инфекцияларының алдын алу шаралары туралы айтып берді. Бұл аурулардың таралу шегі дәстүрлі түрде жаз-күз мезгіліне сәйкес келеді, деп хабарлайды QZ NEWS тілшісі.
Спикердің айтуынша, аурушаңдықтың маусымдық артуы тұрғындардың саяжайларға жаппай шығуымен, жаңа піскен көкөністер мен жемістерді көп тұтынуымен, тез бұзылатын өнімдердің көшедегі саудасының кеңеюімен және ашық су айдындарында шомылумен тікелей байланысты. Жіті ішек инфекцияларына дизентерия, сальмонеллез, ротавирустық және норовирустық инфекциялар, сондай-ақ А гепатиті жатады. Әсіресе балалар бұл ауруларға жиі шалдығады.
«Ішек инфекцияларын қоздыратын микроорганизмдер сыртқы ортаға өте төзімді болып келеді және өздерінің ауру тудыратын қасиеттерін бірнеше күннен бірнеше айға дейін сақтай алады. Микробтардың таралуына су, топырақ, тұрмыстық заттар мен азық-түлік өнімдері ықпал етеді. Сонымен қатар бактериялар тағамның сыртқы түрі мен дәмін өзгертпестен белсенді түрде көбейе береді. Аурудың негізгі белгілері – әлсіздік, енжарлық, тәбеттің төмендеуі, іш өту, құсу, іштің ауыруы және дене қызуының көтерілуі», – деді Елена Коптяева.
Дәрігер инфекция көзі әрдайым адам – науқас немесе бактерия тасымалдаушы екенін атап өтті. Жаз мезгілінде қайта термиялық өңдеусіз тұтынылатын тағамдар ерекше қауіп төндіреді. Олардың қатарында крем қосылған кондитерлік өнімдер, түрлі салаттар, винегреттер, шикі сүт пен сүзбе бар. Сондай-ақ құдықтардан немесе ашық су айдындарынан алынған су да үлкен қауіп көзі болып саналады, өйткені ол арқылы тырысқақ пен іш сүзегі сияқты қауіпті аурулар жұғуы мүмкін.
Балалар мен ересектердің денсаулығын қорғау үшін инфекционист қарапайым гигиена ережелерін қатаң сақтауға кеңес берді: қолды сабынмен мұқият жуу, тек қайнатылған немесе бөтелкедегі суды ішу, жуылған көкөністер мен жемістерді қайнаған сумен шаю, тоңазытқыштағы өнімдердің жарамдылық мерзімін бақылау және тек арнайы белгіленген орындарда ғана шомылу қажет.