СҚО мектеп оқушылары IQanat Республикалық Олимпиадасының I кезеңіне белсенді қатысты

Қазақстанда IQanat 2025 олимпиадасының I кезеңі аяқталып, ауыл балаларына арналған бұл шара бүкіл ел бойынша өткізілді. Биыл осы кезеңге рекордтық көрсеткішпен – 170 ауданнан 3300 ауылдағы 64 000-нан астам 8-сынып оқушысы қатысты. Солтүстік Қазақстан облысынан 13 аудандағы 266 ауыл мектебінен 1643 сегізінші сынып оқушысы олимпиадаға қатысқанын хабарлайды QZ NEWS.

Ұйымдастыруда маңызды рөлді 1100 IQanat түлегі мен еріктілері атқарды – олар бұрынғы жылдардың финалистері, мектеп оқушылары және түлектер. Олар тіркеуге көмектесті, қатысушыларды қарсы алып, ешкімнің көшіріп жазуына жол бермеді және балалардың өз күшіне сенуіне мүмкіндік беретін қолдау атмосферасын жасады. Бұл – жобаның «giving back» принципі: кеше қатысқандар бүгінгі жаңа ұрпаққа жол көрсетеді. СҚО-дан еріктілер мен түлектер ретінде 45 адам қатысты.

Барлық үш кезеңнен өткен жеңімпаздар демеушілер есебінен Боровой қаласындағы IQanat пансионатына оқуға түсуге немесе үш жылдық постолимпиадалық қолдауға қатысуға мүмкіндік алады. Бұл жерде балалар ҰБТ мен халықаралық емтихандарға дайындалады, ағылшын тілін жетілдіреді, IT, кәсіпкерлік және заманауи soft skills дағдыларын дамытады – бәрі де жақсы университеттерге түсуге дайындыққа көмектеседі.

IQanat білім қорының PR-директоры Айдана Инкарбекова атап өткендей, бүгінгі таңда IQanat – 240 кәсіпкер-серіктестен тұратын қауымдастық, олар ауыл балаларының әлеуетін жүзеге асыруға көмектеседі. Жобаның арқасында IQanat түлектерінің 94%-ы Қазақстан мен шетелдегі жетекші университеттердің гранттарына түскен, 19 елде білім алып, арман мен табандылық кез келген қиындықтан күшті екенін дәлелдеп жүр.