15 тәулік және 7 жыл жүргізуші куәлігінен айыру: Уәлиханов ауданында мас күйінде көлік жүргізген жүргізушіге үкім шықты
Уәлиханов аудандық соты әкімшілік құқықбұзушылық ісін қарап, алкогольдік масаң күйде автобус жүргізген қоғамдық көлік жүргізушісіне қатысты қатаң жаза тағайындады, деп хабарлайды QZ NEWS.
Іс материалдарына сәйкес, рейдтік іс-шара барысында полиция қызметкерлері жүргізуші Ч.-ның көлікті жеңіл дәрежедегі алкогольдік мас күйінде басқарғанын анықтаған. Сот отырысында құқықбұзушы өз кінәсін толық мойындап, жасаған ісіне өкінетінін білдірді.
«Сот Қазақстан Республикасының Әкімшілік құқық бұзушылық туралы кодексінің 608-бабының 1-бөлігінде көзделген (алкогольдік, есірткілік немесе уытқұмарлық масаң күйде көлік құралын басқару) бұлтартпас санкцияны басшылыққа ала отырып, келесі шешімді қабылдады: 15 тәулік әкімшілік қамауға алу және 7 жыл мерзімге көлік жүргізу құқығынан айыру. Қазіргі уақытта сот қаулысы заңды күшіне енген жоқ», – делінген Уәлиханов аудандық сотының хабарламасында.