«AMANAT» партиясы Петропавлдағы жаңа нысандарда мүмкіндігі шектеулі адамдар үшін қолжетімділік талаптарының бұзылғанын анықтады
«AMANAT» партиясының Солтүстік Қазақстан облыстық филиалының мониторингтік тобы «Береке» шағын ауданындағы жаңадан ашылған әлеуметтік инфрақұрылым нысандарына тексеріс жүргізіп, мүмкіндігі шектеулі азаматтарға қолжетімділік талаптарының сақталмағанын анықтады, деп хабарлайды QZ NEWS.
Мониторингтік топтың мүшесі, облыстық мәслихат депутаты Ирина Эктованың айтуынша, бұл мәселе жүйелі сипатқа ие және техникалық та, кадрлық та тұрғыдан өзекті болып отыр.
Партия өкілдері №2 емхана филиалында келесі бұзушылықтарды тіркеді:
- Үш көтергіштің екеуі ғана жұмыс істейді, ал орталық көтергіш пен лифт мүлде істемейді;
- Тактильді жолақтар жоқ;
- Қолжетімді орта элементтерінің ішінде тек Брайль қарпі ғана бар;
- Қазіргі уақытта мекемеде екі педиатр мен бір терапевт жұмыс істейді, қабылдау тек бірінші қабатта жүргізіледі.
Осындай жағдай жаңа, 2025 жылдың ақпанында ашылған балабақшада да байқалған: пандус стандартқа сай емес — тұтқалар орнатылмаған, қызметкерді шақыру түймесі жоқ, ал мүмкіндігі шектеулі жандарға арналған әжетхана мүлде қарастырылмаған.
«Біздің мақсатымыз — жаңа нысандар қағаз жүзінде ғана емес, іс жүзінде де барлық азаматтар үшін қолайлы әрі қауіпсіз болуы», — деп атап өтті Ирина Эктова.
Тексеру қорытындысы бойынша партия мүшелері анықталған бұзушылықтарды жою жөнінде тиісті мекемелер басшылығына ұсынымдар жолдап, материалдарды уәкілетті органдарға жіберді. Барлық ескертулер толық орындалғанша мониторинг жалғасатын болады.
