Петропавлда екі өңірдің жас IT-мамандары IDEA BATTLE аясында өз жобаларын таныстырды
Петропавлда IDEA BATTLE ашық питч-сессиясы өтті. Бұл формат Солтүстік Қазақстан және Қостанай облыстарынан келген жаңадан ісін бастап жатқан әзірлеушілерді, командаларды, IT-сала мамандары мен бизнес өкілдерін біріктірді. Шараға 8 команда қатысты, деп хабарлайды QZ NEWS.
IDEA BATTLE ұйымдастырушысы – SKO Hub. Негізгі мақсат – жас IT-кәсіпкерлерді қолдау, стартап мәдениетін дамыту және Солтүстік Қазақстан облысында жаңа технологиялық шешімдердің пайда болуына ықпал ету. SKO Hub директоры Нұргүл Булатованың айтуынша, питч-сессияның ерекшелігі – қатысушылардың жай идея емес, дайын прототип немесе өнімнің минималды жұмыс істейтін нұсқасын алып келуі.
«Қатысушылардың арасында мектеп оқушылары да, студенттер де, қазіргі мамандар да болды. Бізді Қостанай облысы таңғалдырды. Жобаларын көрсету үшін арнайы келді. Сарапшылар өте сапалы кері байланыс берді, ал жігіттер оны бірден жұмысқа алды. Баттлға қатысушылар SKO Hub мерчін алды – футболка, блокнот, қалам және стикерпак. Бүгін жүлде қоры жоқ, өйткені бұл форматта балалар өз идеяларын таныстырып, кері байланыс алады», – деді Нұргүл Булатова.
IDEA BATTLE қатысушыларының жобалары білім, өнеркәсіп, АӨК, психология және басқа да салаларды қамтыды. Ең көзге түскен командалардың бірі – Қостанай облысынан келген қатысушылар болды. Олар екі стартапты қорғады: жасанды интеллект арқылы автомобиль бөлшектеріндегі ақауларды анықтау және өнеркәсіптік кәсіпорындарды цифрландыру платформасы. Қостанайдағы ҚР ІІМ Ш. Қабылбаев атындағы академияның 3-курс курсанты Тамерлан Алашбаевтың айтуынша, олардың командасы IT-бағытындағы хакатондар мен питчингтерге жақында ғана қатыса бастаған.
«Біз курсанттар, болашақ полиция қызметкерлері қоғамға қажет лайықты стартаптар жасай алатынымызды көрсеткіміз келеді. IT-ді жақсы меңгергенімізді дәлелдеу үшін келдік. Бізде өте жақсы идеялар бар. Жақында Қостанайда қатысып, алғашқы стартапты таныстырдық. Қазылардың сынын тыңдап, жобамызды жақсарттық. Командада тек курсанттар ғана емес, №1 мектеп-лицейдің оқушылары да бар. Олар бізге қатты көмектеседі. Командада 10 адам, жастары 15 пен 20 аралығында. Қазақстан бойынша бұдан әрі де қатысуды жоспарлап отырмыз», – деді Тамерлан Алашбаев.
Питчингтен кейін қазылар алқасы қызықты жобаларды атап өтті. Сондай-ақ қатысушыларға жігерлендіретін кеңес беріп, ең бастысы – берілмеу керектігін еске салды.
«Ұсынылған 10 идеяның біреуі ғана іске асады. Бұл – сізде ынта болған кезде 100 идея ойлап таба аласыз деген сөз. Сонда мүмкіндік те артады. Ең кереметі – сіздердің осында жүргендеріңіз, қорықпай тәжірибе жасап көруіңіз. Істеп жатқан ісіңізден ләззат алыңыздар», – деді қазылар алқасының өкілдерінің бірі.
Шара пицца-брейкпен және еркін форматтағы кездесумен аяқталды. Онда қатысушылар танысып, байланыс алмасып, жаңа идеяларды талқылады.
SKO Hub директоры Нұргүл Булатованың айтуынша, жыл соңына дейін ауқымды Urbathon және цифрлық дағдылар мен әйелдер кәсіпкерлігіне арналған форум өтеді.