Петропавлда мектеп оқушыларына жеңіл ақшаға құмарлықтың темір торға апаратыны түсіндірілді
«Заң және Тәртіп» тұжырымдамасын іске асыру аясында Петропавлда жастардың құқықтық сауаттылығын арттыруға және қылмыстың алдын алуға бағытталған профилактикалық кездесу өтті. Іс-шараға 300-ден астам жоғары сынып оқушылары мен колледж студенттері қатысты, деп хабарлайды QZ NEWS.
Оқушылар мен студенттерге прокуратура, полиция, қылмыстық-атқару жүйесі қызметкерлері, сондай-ақ қоғам қайраткерлері түсіндіру жұмыстарын жүргізді. Негізгі тақырыптар киберқауіпсіздік, бұзақылық үшін жауапкершілік, алаяқтық және есірткі сату мәселелері болды.
Ерекше қызығушылық туғызған тұс — сотталғандармен ұйымдастырылған телекөпір. Олар өз қателіктері, жеңіл жолмен ақша тапқысы келуі және ортасының ықпалы қалай темір тордың ар жағына апарғаны туралы ашық айтты.
Бұл жауапкершілікке толы әңгімелер жасөспірімдер үшін көз ашар сабақ болып, қылмыстың ешқашан өз әрекетіңді ақтамайтынын ұғындырды.
Қатысушыларға «Жеткізушілер. Жаза» атты деректі фильмнен үзінділер де көрсетілді.Мотивациялық бөлімде WBA Super және IBO нұсқалары бойынша әлем чемпионы Жанат Жақиянов пен жеңіл атлетикадан Азия чемпионатының жүлдегері Маргарита Мұқашева сөз сөйледі. Олар өз тәжірибелерімен бөлісіп, жастарды өзіне сенуге, азғырулардан аулақ болуға және адал жолмен өмірде табысқа жетуге шақырды.