Петропавлда өңірдің танымал әйелдері жастармен TEDx форматында кездесті

Солтүстік Қазақстан облысының белгілі әйелдерімен шабыт беретін TEDx-кездесу Петропавл қаласындағы Достық үйінде өтті. Республика күніне арналған шарада олардың ел дамуына қосқан үлесі сөз болды, деп хабарлайды QZ News тілшісі.

Мотивациялық кездесуді Қазақстан Халық партиясының Әйелдер қанаты мен қазақ мәдени-ағартушылық орталығы «Urpaq» ұйымдастырды. Көрермендерге өңірдің табысты әйелдері өз жетістіктері мен өмір жолдары туралы баяндап берді. Спикерлер қатарында өңірдің шығармашылық өкілдері болды: вокалдық-фольклорлық «Балқадиша» ансамблінің көркемдік жетекшісі Панзагүл Сейдахметова және «Кентрон» Солтүстік Қазақстан облыстық армян мәдени орталығы» қоғамдық бірлестігінің төраға орынбасары Светлана Малхасян.

Шара жас пен үлкенді біріктірді — шабыт беретін кездесуге түрлі буын өкілдері, қоғам белсенділері, Қазақстан халқы Ассамблеясының мүшелері, оқытушылар мен студенттер қатысты. Кездесу нағыз диалог алаңына айналды – қатысушылар спикерлерге өздерін қызықтырған сұрақтарды қойып, пікір алмасты. TEDx форматы өзекті тақырыптарды заманауи әрі түсінікті түрде талқылауға мүмкіндік берді.

– Әйелдер мықты, тәуелсіз Қазақстанды қалыптастыруда бұрын да, бүгінде де шешуші рөл атқарып келеді. Олардың өмір жолдары – тек өңірлік тарихтың ғана емес, ұлттық мұрамыздың бір бөлігі. TEDx форматы бұл туралы заманауи, әсерлі және шабыттандыра жеткізуге мүмкіндік береді, – деді ұйымдастырушылар.

Өңірдің үлгілі әйелдері жастарға шабыт беріп қана қоймай, өмірлік тәжірибесімен де бөлісті. Мұндай кездесулер жас буынды елінің дамуына өз үлесін қосуға ынталандырады.