Петропавлда Жабаев көшесі 49а мекенжайындағы жаңа үй тұрғындары жарықтың жиі сөнуіне шағымдануда
Петропавл қаласында Жас Өркен ықшам ауданындағы Жабаев көшесі 49а мекенжайында орналасқан жаңа көпқабатты үйдің тұрғындары электр қуатының жиі өшіп қалу мәселесіне тап болған. Олардың айтуынша, бұл жағдай 2024 жылғы су тасқынынан кейін басталған, деп хабарлайды QZ NEWS.
Редакцияға көмек сұрап осы үйдің тұрғындарының бірі хабарласқан болатын. Оның айтуынша, отбасы бұл үйде екінші жыл тұрып жатыр. 2024 жылдың сәуіріне дейін жарық мәселесі болмаған. Алайда сәуір–мамыр айларынан бастап электр жиі өшіп, жағдай әлі күнге дейін жалғасып келеді.
«Биыл 30 мамырда жарықты сөндіріп тастады. Шамамен кешкі сағат 8-де өшіп, келесі күні таңғы 11-ге дейін болмады. 23 қыркүйекте Жас Өркеннің көп бөлігі жарықсыз қалды. 30 минуттан кейін барлық үйлерге электр берілді, тек біздің үш үй түнгі 2-ге дейін жарықсыз отырды. Ал кеше, 14 қазанда, тағы да кабель зақымдалды. Сағат 17:00-ден таңғы 4:00-ке дейін жарық болған жоқ», – дейді тұрғын.
Ол жарықтың жиі өшуі жаңа үйлер үшін аса қиындық туғызатынын айтады, себебі мұнда плита электрлі, ал су сорғылар арқылы беріледі.
«Жарықты сөндірсе, жедел саты тоқтап қалады. Біз 17-қабатта тұрамыз. Біз жаспыз, спортпен айналысамыз, бірақ егде жастағы немесе мүмкіндігі шектеулі адамдар бар ғой. Сосын су болмайды, себебі су сорғымен беріледі, сәйкесінше дәретхана да жұмыс істемейді. Электрлі плиталар істемейді, өйткені үйлер газбен қамтылмаған. Жарық өшкенде жұмысқа жиналу — нағыз қиындық. Телефондар да зарядталмайды. Баламыз мектеп оқушысы, кейде сабақтарын телефон шамының жарығымен орындайды. Бұл көзге зиян», – деп бөлісті тұрғын.
Тұрғындар үнемі ПИК-қа және 109 қызметіне хабарласады. Алайда, олардың айтуынша, әрдайым «апатты сөндіру жүріп жатыр» деген жауап алады, кейде операторлар тіпті телефонды қоя салады.
«Өкініштісі, біз барлық салық пен коммуналдық төлемдерді уақтылы төлейміз, бірақ соған лайық қызмет ала алмай отырмыз», – дейді тұрғын.
Кабельдің жиі зақымдалуынан туындаған деп болжанған бұл мәселе әлі күнге дейін шешілмеген. Тіпті тұрғындар оны блогерлер арқылы жариялап көргенімен, нәтиже болмаған.
Сонымен қатар, тұрғындар үйлерінің қаланың кіреберісінде орналасқанын және қаланың көркі саналатынын атап өтті. Алайда үш үйдің ортаңғысы бір жылдан бері сыртқы жарықсыз тұр. Тиісті органдарға бірнеше рет хабарласқанмен, жауап болмаған.