Солтүстік Қазақстан облысында арпамен тиелген тіркеме аударылып қалды

5 қараша күні кешке, шамамен сағат 17:00-де «Мамлютка–Қостанай» автожолында, Сенжарка ауылының маңында «КамАЗ» жүк көлігінің тіркемесі аударылып қалды. Көлік Дубровное ауылына бағыт алған. Оқиғаның себебі – тіркеменің техникалық ақауы болған, деп хабарлайды QZ NEWS.

Жол-көлік оқиғасы салдарынан жүк көлігі тасымалдап келе жатқан арпа жол бойына төгілген.

СҚО полиция департаментінің мәліметінше, оқиға орнына «Аби жер» ЖШС-нен арнайы техника жедел жіберілген. Төгілген астықты жинау, тіркемені жөндеу және орнына қою жұмыстары сағат 21:00-ге дейін жалғасқан.

«Оқиға орнында полицейлер жол қозғалысының қауіпсіздігін қамтамасыз етті. Олар жүргізушілерді ескерту үшін арнайы жарық шамдарын пайдаланды. Бұл әсіресе қараңғы уақытта, адамдар жұмыстан қайтып жатқан мезгілде болды. Жағдай тұрақталған соң “КамАЗ” сапарын жалғастырды», – делінген хабарламада.