СҚО әкімі Ғауез Нұрмұхамбетов азаматтарды жеке қабылдады

Оқушылары сарайында облыс әкімі Ғауез Нұрмұхамбетовтің, сондай-ақ мемлекеттік, құқық қорғау және атқарушы органдардың басшылары, аудандар мен ауылдық округтердің әкімдерімен бірге азаматтарды жеке қабылдауы өтті. Тұрғындардың сұрақтарына 30-дан астам мемлекеттік органның өкілдері жауап берді. Сонымен қатар 60 қоңырау түскен бірыңғай call-орталық жұмыс істеді, деп хабарлайды QZ NEWS.

Онлайн және офлайн форматта әкім 47 адамды қабылдап, әрбір өтініш бойынша жауапты мемлекеттік органдарға нақты тапсырмалар берілді. Облыс бойынша барлығы 703 өтініш тіркелген.

Тұрғындар әртүрлі мәселелерді көтерді: аумақты абаттандыру, жолдарды жөндеу, тұрғын үй, жұмыспен қамту, коммуналдық қызметтер және әлеуметтік қолдау. Барлық өтініштер бойынша қажетті түсіндірмелер мен кеңестер берілді. Әрбір сұрақ бақылауға алынды.

Іс-шараға «AMANAT» партиясының СҚО филиалының атқарушы хатшысы Жеңис Асанов та қатысты. Тұрғындар оған өңірдегі өзекті мәселелер бойынша жүгінді.

Бірінші болып Қызылжар ауданы Шаховское ауылындағы тұрғындардың бірлескен өтініші түсті. Азаматтар құстардың (қаздардың) жаппай қырылуы туралы хабарлап, оқиғаның себептерін анықтауға және келтірілген шығынды өтеу мәселесін шешуге көмек сұрады. Бұл сұрақ облыс әкімінің орынбасары Марат Тасмағанбетов пен тиісті өкілетті органдармен бірлесіп қаралуда.

Сондай-ақ «Жас Өркен» ықшам ауданындағы тұрғындардан электр жарығының үзілуі туралы өтініш түсті. Азаматтардың айтуынша, үйлер бірнеше күнге жарықсыз қалады. Атқарушы хатшы бұл жағдай бақылауда екенін және қажетті құрылымдар хабардар етілгенін айтты.

Үшінші мәселе – СҚО Білім басқармасының әдістемелік кабинеті жұмысына қатысты болды. Өтініш білдіргендерге әрі қарайғы әрекеттер бойынша түсіндірмелер мен ұсыныстар берілді.