Қазақстанда жалпыға бірдей декларациялау әсерінен бірсыпыра ЖК жабылды

Жеке кәсіпкерлер 2024 жылы активтері туралы декларация тапсыруы керек. Алайда, олардың бірсыпыра бөлігі жалпыға бірдей декларацияға қатыспау үшін жабылып жатыр, деп хабарлайды QZ media тілшісі NUR.KZ. сілтеме жасап.

2024 жылы жалпыға бірдей декларациялаудың үшінші кезеңі басталды, оған жеке кәсіпкерлер (ЖК), заңды тұлғалардың құрылтайшылары, басшылары мен қатысушылары, сондай-ақ олардың жұбайлары қатысады.

Заңға сәйкес, тіркелген, бірақ жұмыс істемейтін заңды тұлғасы немесе жеке кәсіпкерлігі бар азаматтар да декларация тапсыруы керек. Мұндай кәсіпкерлерге 2023 жылы жалпыға бірдей декларациялаудың үшінші кезеңіне қатыспау үшін өз қызметін тоқтату туралы салықтық өтініш беру жайлы хабарланды.

Енді бірсыпыра кәсіпкер бұл кеңесті ұстануға шешім қабылдағаны белгілі болды. Ұлттық статистика бюросының (ҰСБ) хабарлауынша, желтоқсан айында тіркелген жеке кәсіпкерлік субъектілерінің саны 2023 жылғы қарашамен салыстырғанда 2,4%-ға – 1,72 млн субъектіге дейін азайды.

Сонымен қатар, белсенді емес ЖК бірге бұрын кәсіпкерлік қызметін белсенді жүргізгендер де жабылды. Желтоқсан айында олардың саны 1,9%-ға азайды (1,64 млн субъект).

ҰСБ хабарлағандай, бұл төмендеу 2024 жылы жалпыға бірдей декларацияның енгізілуіне байланысты орын алды. Алайда, жылдық бөліністе тіркелген жеке кәсіпкерлер саны әлі де көп – шамамен 8,5%-ға, ал жұмыс істеп тұрған ЖК саны 11,1%-ға өсті. Олардың көпшілігі қолма-қол ақшасыз есеп айырысуға белсенді көшуде.