Петропавлдық «Экспромт» халық би театры Біріккен Араб Әмірліктеріне жолдама жеңіп алды

Қалалық мәдениет үйінің «Экспромт» халық би театры «TURKESTAN MUSIC FESTIVAL» халықаралық байқау-фестивалінде үздіктер қатарынан көрінді. Жеңімпаздарды жерлестеріміз Петропавлда салтанатты түрде қарсы алды, деп хабарлайды QZ Media тілшісі.

Петропавлдық би тобы 52 ансамбльмен жүлделі орындарды сарапқа салды. Жарысқа барлығы 1000-нан астам адам қатысты.

«Байқауда СҚО-ның атынан жалғыз біз өнер көрсеттік. Қырғызстаннан келген қатысушылар да бақ сынады. Тек 5 команда бас жүлде атағын алды, оның ішінде «Экспромт» та бар. Біз бас жүлдені эстрадалық билеріміздің бірі үшін алдық. Балалар жалпы 4 номинация бойынша қатысты. Балалар биі мен эстрадалық биде 1-дәрежелі лауреат атандық, ал заманауи хореографияда 2-дәрежелі лауреат атана алдық», – деді «Экспромт» халық би театрының жетекшісі Алена Маринец.

Жас жұлдыздар медаль, кубок және дипломдардан бөлек, биылғы жылдың желтоқсан айында Біріккен Араб Әмірліктерінде өтетін жарысқа қатысу үшін тегін сертификатқа ие болды.