Айыртау ауданында құрылысы ұзаққа созылған хоккей корты ақыры пайдалануға берілді

Айыртау ауданы Саумалкөл ауылында құрылысы бақандай 3,5 жылға созылған жабық хоккей корты пайдалануға берілді. Бұл жайлы СҚО Сыбайлас жемқорлыққа қарсы қызметі жариялады, деп хабарлайды QZ News тілшісі.

Құны 111,4 млн теңгені құрайтын спорт нысаны 2022 жылдың қаңтар айында халықтың пайдалануына тапсырылуы тиіс еді.
Алайда, мердігер – «Аквабилд» ЖШС жосықсыздығына байланысты, жоспарланған мерзімге құрылымның тек іргетасын құю бойынша жұмыстар атқарылған.

«Облыстың Сыбайлас жемқорлыққа қарсы қызметінің араласуынан кейін, құрылыс мерзімін бірнеше рет бұзу себебінен тапсырыс беруші «Аквабилд» ЖШС-мен шартты бұзды. Нәтижесінде «Sport Equipment» жаңа мердігерлік ұйымы анықталып, барлық жұмыстар кестеге сәйкес орындалды және хоккей корты сәтті пайдалануға берілді»,- делінген хабарламада