Наталья Богданова, Алтынбек Аусағитов және Ислам Евлоев сынды солтүстікқазақстандық спортшылар СҚО әкімінен пәтер кілттерін алды

Облыс әкімдігінде әлем чемпионаттары мен Көшпенділер ойындарының жүлдегері атанған солтүстікқазақстандық спортшыларды марапаттау шарасы өтті. Салтанатты жиында аймақ басшысының атынан спортшылар мен жаттықтырушылар құрметке бөленді, деп хабарлайды QZ News тілшісі.

Еске салайық, Азия ойындарында Наталья Богданова қола жүлдегер атанды, Алтынбек Аусағитов – қазақ күресінен әлем чемпионы, ал Ислам Евлоев грек-рим күресінен U20 жасөспірімдер арасында өткен әлем чемпионатында топ жарды. Иорданияда жалауын желбіреткен әлем чемпионатында біздің 17 жастағы жерлесіміз Анна Стратан да сәтті өнер көрсетті, ол әйелдер арасындағы күресте қола жүлдеге ие болды.

Өз сөзінде облыс әкімі Ғауез Нұрмұхамбетов спортшылардың еңбегін атап өтті және жеке жетістіктерімен басқа балалардың өміріне әсер еткендері үшін алғыс білдірді.

“Өскелең ұрпақ сіздерге қарап, бой түзейді. Өздеріне деген сенімділік пайда болады, спортқа таңдау жасайды. Біз жаттықтырушыларға алғыс айтамыз. Спортшыларды даярлау – жаттықтырушылардың ең жоғары шеберлігі. Спортшының ерлігі мен күш-қуаты – орасан зор еңбек. Жалпы, біз спортшылар мен жаттықтырушыларға қолдау көрсетуді жалғастыратын боламыз. Сіздерге барлық жағдайлар жасалуда. Біз жыл сайын жаңа спорт нысандарын салып, ашудамыз , – деп атап өтті Ғауез Нұрмұхамбетов.

СҚО дене шынықтыру және спорт басқармасының басшысы Сергей Мелехов атап өткендей, Наталья Богдановаға, Алтынбек Аусағитовқа және Ислам Евлоевқа пәтер кілттері табыс етілді. Басқа спортшыларға, сондай-ақ олардың жаттықтырушыларына 300 000-нан 1 000 000 теңгеге дейінгі ақшалай сертификаттар мен алғыс хаттар табыс етілді.

“Өздеріңіз білетіндей, бүгінгі таңда облыста жазғы спорт түрлерінен де, қысқы олимпиадалық спорт түрлерінен де үлкен нәтижелер бар. Бүгін біз жеңімпаз спортшыларымызды құттықтадық”, – деді Сергей Мелехов.