Президенттік көпсайыс бойынша ҚР Кубогында бақ сынау үшін Петропавлға 8 өңірден 95 спортшы келді

Петропавлда президенттік көпсайыстан ҚР Кубогы бастау алды. Жарыс үш күнге жалғасады. Мергендік сынау спортшылар үшін алғашқы сынақ болды, деп хабарлайды QZ News тілшісі.

“3 қарашада спринт өтеді. Жылдамдыққа жүгіру, ал түстен кейін жүзу болады. Жарыстың үшінші күні спортшылар өздерінің шыдамдылықтарын ұзаққа жүгіру барысында сынайды. Бұл кезең А.Винокуров атындағы Спорт сарайында өтеді. Президенттік көпсайысқа 8 өңір қатысуда. Марапаттар үшін 95 спортшы күресіп жатыр. Бұл – 12 жастан асқан балалар, 70 жастан асқан ардагерлер, яғни барлық жас топтары бар. Спорттың 4 түрі бойынша жеңімпаздарды анықтаймыз. Марапаттар жеке және командалық есепте табысталады. Жеңімпаздар Қазақстан ұлттық құрамасының сапына еніп, халықаралық жарыстарға қатыса алады”, – деді жарыстың бас төрешісі Руслан Қожаев.

Солтүстік Қазақстан облысы көпсайыс бойынша көшбасшылар қатарында. Теріскейліктердің жаттықтырушылар құрамы мықты саналады

“Біздің спортшылар әрқашан жоғары орындарға ие болады. Тәжірибелі жаттықтырушыларымыз бар. Басқарманың қолдауын сезінеміз, жарыстарға үнемі шығамыз. Биыл біздің спортшылар әлем чемпионатында екі рет екінші орын алып, халықаралық дәрежедегі спорт шебері нормативін орындады. СҚО-да Қазақстан чемпиондары көп”, – деді Руслан Қожаев.