СҚО командасы Президенттік көпсайыстан ҚР Кубогында жалпыкомандалық есепте екінші орын иеленді

Петропавлда Президенттік көпсайыстан ҚР Кубогының жеңімпаздары мен жүлдегерлерін марапаттау рәсімі өтті, деп хабарлайды QZ News тілшісі.

Жарысқа Астана, Алматы, Қарағанды, Қызылорда, Маңғыстау, Қостанай, Ақтөбе облыстарынан және СҚО-дан 96 спортшы қатысты. Марапаттар үшін балалар, жасөспірімдер мен қыздар, сондай-ақ ардагерлер бақ сынады.

“Әр спорт түріне ұпай беріліп, олардың ең көп жиынтығы бойынша жеңімпаз анықталды. СҚО командасы жалпыкомандалық екінші орынды иеленді. Біздің спортшы Жоламан Ақтары ҚР спорт шеберінің нормативін орындады. Бірінші орын Қостанай облысының командасына бұйырды, ал үшінші орынды Маңғыстау облысының спортшылары иеленді. Естеріңізге сала кетейік, спортшылар спорттың 4 түрінен жарысты. Бұл – оқ ату, спринт, жүзу және қашықтыққа жүгіру”, – деді жарыстың бас төрешісі Руслан Қожаев.