Қаржы министрлігі мемлекеттік қызметкерлерге берілетін сыйақыларға тыйым салмайды

ҚР Қаржы министрлігінде мемлекеттік қызметшілерге сыйақы беруге тыйым салуға негіз жоқ деген мәлімдеме жасалды. Ал бұл мәселені қоғамдық талқылау өткен аптада басталды, деп хабарлайды QZ News тілшісі.

Үкіметтің 2001 жылғы қаулысына сәйкес, мемлекеттік аппарат қызметкерлеріне сыйлықақылар мен үстемеақылар төлеу, егер ол үнемделген бюджет қаражаты есебінен жүзеге асырылса, мүмкін болады. Осы қаулымен үнемдеу пайда болған жағдайда сыйлықақы төлеу жүзеге асырылуы мүмкiн шығыстар баптарының нақты тiзбесi айқындалған.

Сыйлықақы беру тәртібін реттейтін құжатқа сыйлықақы төлеуді шектейтін өзгерістер енгізілмегенін атап өткен жөн.

«Бүгінгі таңда аталған қаулыға және басқа заңнамалық актілерге сыйлықақы беруді шектейтін өзгерістер енгізілмегендіктен, мемлекеттік қызметшілерге сыйлықақы төлеуге тыйым салуға негіз жоқ», – деп баса айтты Қаржы министрлігінде.

Министрлік мемлекеттік органдарды қаулы нормаларын қатаң сақтауға және белгілі бір баптар бойынша үнемдеуді ғана пайдалануға, атап айтқанда іссапарларға, үй-жайларды жалға алуға, коммуналдық және көлік қызметтеріне бағытталған қаржының қалғанын жұмсауға шақырды. Ірі инвестициялық жобаларды іске асырудан және мемлекеттік аппараттың жұмысына әсер етпейтін материалдық активтерді сатып алудан үнемделген қаражат бюджетке қайтарылуы тиіс.