Прокуратура органдарының ардагерлері өскелең ұрпақпен кездесті

Конституция күні қарсаңында Құқық қорғау органдары академиясында жас мамандар прокуратура органдарының ардагерлері, 3 санаттағы мемлекеттік әділет кеңесшілері Әсет Әділхан және Сәуле Айтпаевамен кездесті, деп хабарлайды QZ Media тілшісі.

Ардагерлердің әрқайсысы қадағалау органдарының тарихында лайықты орын алады. Көпшілік олардың әңгімелерін үлкен қызығушылықпен тыңдады, қонақтардың еңбек жолы мен өмірінен көптеген қызықты және танымдық мәліметтер алды.

Сәуле Мұханбедианқызы Айтпаева 30 жылдан астам прокуратура саласында еңбек етті. Ол – Қазақстан тарихында генерал шенін алған тұңғыш әйел. Бұл оның заңдылық пен тәртіпті қамтамасыз етуге қосқан үлкен жеке үлесіне берілген лайықты баға.

Әсет Малғаждарұлы Әділхан бірнеше облыстың прокуратурасын табысты басқарды, Бас прокуратураның арнайы прокурорлар департаментін басқарды. Өңірлердегі қадағалау жұмысын тиімді қамтамасыз еткен беделді де білікті басшы ретінде өзін танытты.

Жастармен қоштаса отырып, тәлімгерлер өздерінің қызметтік міндеттерін адал атқаруға, заңгер мамандығының лайықты ізбасары болуға тілек білдірді. Ардагерлер студенттерге оқу ордасының қоғамдық және спорттық өміріне белсенді қатысқандары үшін сертификаттар табыс етті.