Түркияда өткен халықаралық ойындарда жеңіске жеткен ПД кикбоксшылары елге оралды

Түркияда құқық қорғау органдары қызметкерлері арасында өткен бірінші халықаралық кикбокс ойындарында жеңімпаз және жүлдегер атанған СҚО ПД қызметкерлері елгеоралды, деп хабарлайды QZ News тілшісі.

Дүбірлі додаға 13 елден 100-ден астам спортшы қатысты. Қазақстан құрамасының құрамында 11 кикбоксер өнер  көрсетті. 86 келі салмақ дәрежесінде (фулл контакт) категориясында бақ таластырған Нұрсұлтан Жақыпов Қазақстан қоржынына алтын медаль салды. Айдар Жүніспаев 75 келі салмақ дәрежесінде (лоу-кик)  және Айбек Төлебаев (75 келі, фул контакт) категориясында шеберлік көрсетіп,  үшінші орынға ие болды.

«Бірінші жекпе-жек Түркия өкілімен болды, кейін Өзбекстаннан келген қарсыласпенжұдырық түйістірдім. Финалдық жекпе-жек ең қиын болды, Германиядан келген қарсылас өте мықты болды, бірақ мен жеңіске жеттім. Мен Азияның екі дүркін чемпионы, Әлем кубогының жеңімпазы мен жүлдегерімін, Қазақстан Республикасының жеті дүркін чемпионымын, Қазақстан Кубогының тоғыз дүркін жеңімпазымын», – деді кикбоксингтен құқық қорғау органдары қызметкерлерінің арасындағы бірінші халықаралық ойындардың жеңімпазы Нұрсұлтан Жақыпов.

Осы жылдың басында полиция аға лейтенанты Нұрсұлтан Жақыпов Делиде кикбокстан өткен турнирде чемпион атанды. 2022 жылдың желтоқсан айында тәртіп сақшысы Тайландта өткен жарыста Азия чемпионы атанды. Бұл кикбоксингтен халықаралық чемпионат болды.

«Біздің спортшылар үшін бұл бәсекеге толы жыл әлі аяқталған жоқ. Мен 4 халықаралық турнирге қатысып үлгердім, сондықтан дайындық үздіксіз жүрді. 10-14 желтоқсан аралығында Петропавлда Қазақстан Республикасының чемпионаты өтеді. Құқық қорғау органдары қызметкерлері арасында Халықаралық кикбокс ойындары өткізілгені өте қуантады. Мұндай турнир бұрын спорттың басқа түрлерінен де өткен», – дейді кикбокстан облыстың бас бапкері Әділ Нұржауыпов.