Боксшы- күзетші УҰИ : Бұзақылық ісі бойынша тергеу жалғасуда, жаңа жәбірленушілер анықталды
Полиция бұзақылық дерегі бойынша, күдікті ретінде танылған спортшы-боксшыға қатысты сотқа дейінгі тергеп-тексеруді жалғастырып жатыр. Оқиға қаладағы ойын-сауық орындарының бірінде болған, деп хабарлайды QZ NEWS.
СҚО ПД мәліметінше, тергеу іс-шаралары барысында күдіктінің тарапынан құқыққа қайшы әрекеттер жасалды деп полицияға арызданған тағы екі келуші анықталған.
Еске сала кетейік, бұған дейін спортшы өзін заңсыз қамауға алды деп мәлімдеген видеоқұжат таратқан болатын. Алайда полиция бұл ақпараттың шындыққа сәйкес келмейтінін атап өтті: күдікті бұзақылық дерегі бойынша қылмыстық іс шеңберінде ұсталған.
«Қазіргі уақытта күдікті уақытша ұстау изоляторына (УҰИ) қамаққа алынған. Қылмыстық іске бейнебақылау камераларынан алынған жазбалар тіркелді, сол материалдар негізінде күдіктінің әрекеттеріне құқықтық баға берілетін болады», – делінген хабарламада.
Тергеу нәтижелері бойынша заңға сәйкес процессуалдық шешім қабылданады. Полиция кез келген зорлық-зомбылық пен қоғамдық тәртіпті бұзу әрекеттері заң бойынша жауапкершілікке әкелетінін ескертеді.