Петропавл әкімі Конституция көшесіндегі жаңа тақшайшаларды бүлдіргендер жазаланатынын айтты

Петропавл әкімі Серік Мұхамедиев журналистермен кездесу барысында қайта жөнделіп жатқан Конституция көшесіндегі қымбат әрі жаңа тақтайшалардың сақталуына қатысты тұрғындардың алаңдаушылығына пікір білдірді, деп хабарлайды QZ NEWS.

Облыс орталығының әкімі көшені тазалаудың варварлық тәсіліне жол берілмейтінін атап өтті. Ол тақтайшаларды бүлдіру фактілері тіркелсе, коммуналдық қызметтерге айыппұл салынатынын айтты.

«Егер олар лом сияқты құралмен тазалап жатса, онда айыппұл саламыз. Ал техникаға келсек, қазір қытайдың шағын тракторлары қолданылып жатыр. Біз оларды жеңіл көлік ретінде санаймыз. Сондай-ақ, негізгі талаптардың бірі – олардың сырмаларының астында қорғайтын резеңке пластина бар. Бір ғана щёткамен бүкіл қарды алып тастай алмаймыз. Ондай жағдайларды міндетті түрде IKomek-ке хабарлаңыздар, біз өте қатаң шаралар қабылдаймыз», – деді қала әкімі.

Серік Мұхамедиев Конституция көшесін реконструкциялау барысында басты басымдық жаяу жүргінші аймағын кеңейту мен қызмет көрсетуді қолайлы ету болғанын да атап өтті.

«Менің ойымша, идеясы да, орындалуы да жаман емес. Яғни біз көшені адамдар үшін барынша кеңейттік. Жаяу жүргіншілер көшесіне ескерткіш немесе басқа да нысандар қою – өте оғаш деп есептеймін. Көшені мүмкіндігінше кеңейтіп, техниканың еркін жүріп өтуіне жағдай жасағымыз келді. Ортасына гүлзар немесе басқа да кедергілерсіз», – деді Серік Мұхамедиев.