Дәмханаға келген адамдыұрған петропавлдық тұрғын ҰҚКБ қызметкерлерін өзіне қол жұмсады деп айыптады
Әлеуметтік желілерде петропавлдық тұрғын, боксшы Дамир Алкешевтің видеомәлімдемесі кеңінен таралуда. Ол өзіне ҰҚКБ мен арнайы жасақ қызметкерлері күш қолданғанын айтты, деп хабарлайды QZ NEWS.
«Құрметті Президент, Ішкі істер министрі және Бас прокурор мырзалар! Сіздерге хабарлағым келеді: кеше, 2025 жылдың 7 қарашасында, шамамен сағат 18:30-да, Заводская мен Ауэзов көшелерінің қиылысында мені ҰҚКБ мен арнайы жасақ қызметкерлері ұстап әкетті. Негізі неде екенін білмеймін. Маған ешқандай айып тағылған жоқ. Ұстау кезінде мені ұрып-соқты. Қызметтік көлікке тиеп, жол бойы да соққыға жықты. Петропавл қалалық полиция бөлімшесіне жеткізілген соң, мені дәретханаға апарып, тағы да ұрып-соқты. Әжетханаға батырамыз деп қорқытты, бірдеңеге қол қойғызбақ болды, кейін кабинетке кіргізіп, қамауға аламыз, есірткі заттарын «салып жібереміз» деп қорқытты», – делінген видеодағы Дамир Алкешевтің сөзінде.
Ол сондай-ақ өз бостандығы мен өмірі үшін қорқып, полиция қызметкерлерінің қысымымен қағаздарға қол қойғанын мәлімдеді.
«Кейін мені ауруханаға апарып, денемдегі жарақаттарды тіркеді, ал түсініктемеде мені құлап жарақат алды деп жаздырды. Одан соң көлікке отырғызып, өздерімен «келісуді» көндірмек болды. Қазір жағдайым нашарлап барады, басым айналады, көруім бұлыңғыр. Егер менімен бірдеңе болса, бұған полиция қызметкерлерін – нақтырақ айтқанда, ҰҚКБ мен арнайы жасақты кінәлауды сұраймын», – деп аяқтады өз мәлімдемесін Дамир.
15 сағат ішінде видео 236 мың қаралым және 6000-нан астам реакция жинаған. СҚО Полиция департаментінде хабарлағандай, Петропавл қаласындағы көңіл көтеру орнының бірінде болған бұзақылық фактісі бойынша полицияға арыз түскен.
«Сотқа дейінгі тергеу барысында құқыққа қайшы әрекеттерді 22 жастағы жергілікті тұрғын жасағаны анықталды. Оны полиция қызметкерлері ұстаған. Ұстау кезінде ер адам қарсылық көрсетіп, кейін бөлімшеге жеткізілді. Қазір оған қатысты бұлтартпау шарасы қаралуда. Полиция қызметкерлерінің тарапынан заңбұзушылық орын алды деген мәліметтер бойынша қызметтік тексеріс тағайындалды. Барлық мән-жай жан-жақты зерттеліп, заңға сәйкес шешім қабылданады. ҚР ҚПК-нің 201-бабына сәйкес өзге мәліметтер жариялауға жатпайды», – делінген полицияның ресми түсініктемесінде.
QZ NEWS редакциясының мәліметінше, 1-2 қарашада Дамир Алкешев Петропавлдағы бір дәмханада күзетші болып істеп жүрген кезде Астана тұрғынын ұрып жіберген. Бұл оқиға бейнежазбаға түсіп қалған. Жәбірленуші тарап ҰҚКБ-ға шағымданған. Алкешевке ҚР ҚК 293-бабының 1-бөлігі («Бұзақылық») бойынша қылмыстық іс қозғалған. Сондай-ақ оның ресми түрде жұмыс істемейтіні және күзетші лицензиясы жоқ екені анықталған.
«7 қарашада ҰҚҚБ қызметкерлері жедел алдын алу шараларын жүргізу кезінде Д. Алкешевті анықтап, ұстаған. Ұстау кезінде Алкешев қарсылық көрсеткен. Осыған байланысты оның заңға қайшы әрекеттерін тоқтату үшін ЖҚАЖ қызметкерлері ҚР заңнамасында көзделген күш қолдану шараларын пайдаланған», – делінген редакцияға берілген ресми ақпаратта.