Kozybayev University цифрлық болашақ көшбасшыларын даярлауға арналған «KU AI School» жобасын іске қосты
November 10, 2025 11:43
Kozybayev University жаңа буын мамандарын даярлау және жасанды интеллектіні (ЖИ) білім беру, басқару және бизнес-процестерге енгізу бағытында жүйелі жұмыс жүргізіп келеді. Қазіргі таңда университеттің IT бағдарламаларында 659 студент білім алуда, оның ішінде 190 студент — қос диплом бағдарламасы бойынша оқуда. Бұл туралы «Digital Qyzyljar» форумында университет ректоры Ербол Исақаев мәлімдеді, деп хабарлайды QZ NEWS.
«Биыл біз 57 IT-маманды бітіріп шығарамыз, олардың 22-сі — Аризона университетімен бірлескен бағдарлама түлектері. Бұл студенттер АҚШ-тың Аризона штатындағы университетте оқып, жасанды интеллектіні қолданудың заманауи тәсілдерін меңгеріп жатыр. Олар жақын уақытта Қазақстанға оралып, өз идеяларын жүзеге асыратын болады», — деді Ербол Исақаев.
Осы оқу жылында Kozybayev University студенттері бірқатар инновациялық жобаларды жүзеге асыруда, соның ішінде:
- «Радуга» компаниясы үшін өндірістік деректер мен ML-талдаулар негізінде өнім ақауларын автоматты анықтау жүйесін жасау;
- Жүрек-қан тамырлары ауруларының қаупін бағалау бойынша диагностикалық модель әзірлеу (классификация алгоритмдерін қолдану арқылы);
- Студенттердің академиялық жетістігін болжауға арналған предиктивті IT-жүйе жасау және басқа да жобалар бар.
«Университет жасанды интеллектіні дамытуға бағытталған ұлттық жоба — AI Sana бағдарламасын жүзеге асыратын елдегі тірек жоғары оқу орнына айналды. Kozybayev University еліміздегі үздік 10 ЖОО қатарына енеді және Huawei, Coursera, Astana Hub платформаларында жасанды интеллект бойынша базалық курстарды тәмамдаған студенттер саны жағынан бірінші орында. Бұл — зор жетістік: 11 000-нан астам сертификат алынды. Сонымен қатар білім, көлік, медицина және ішкі аналитика бағыттарында 5 ЖИ-агент әзірленді. Бұл тек оқу жобалары емес — олар университет пен өңірдің цифрлық экожүйесіне енгізілуде. Қазіргі уақытта цифрлық шешімдерді әзірлеу және тестілеу алаңына айналған ЖИ және цифрлық трансформация орталығы жұмыс істейді», — деп атап өтті ректор.
Студенттер мен оқытушылар төмендегі жобалармен айналысып жатыр:
- KU AI Ticket — өтініштерді автоматтандыру жүйесі;
- KU Solutions — интеллектуалды кері байланыс платформасы;
- KU Map — кампустың цифрлық картасы;
- Dormitory Violation — бейнеаналитика және қауіпсіздік жүйесі;
- IGPA — студенттердің әлеуметтік белсенділігін бағалау цифрлық жүйесі.
«Біз жасанды интеллект мектебін — KU AI School жобасын іске қосамыз. Мұнда студенттер мен жоғары сынып оқушылары машиналық оқыту, веб-даму және нейрожелілерді біріктіру дағдыларын меңгереді. Оқу нәтижесінде әр қатысушы өз интеллектуалды қосымшасын — идеядан өміршең өнімге дейін — жасап шығарады. Осындай тәжірибелік форматтар жаңа буынның цифрлық көшбасшыларын қалыптастырады деп сенеміз. Бүгінде Kozybayev University — кадр даярлаудан бөлек, өңірлік AI-экожүйені қалыптастыру орталығы. Университет — жергілікті атқарушы органдар, бизнес пен ғылым арасындағы синергияның өзегі. Дәл осы жерде ертең бүкіл ел көлемінде қолданылатын шешімдер дүниеге келеді. Біздің жетістіктеріміз — серіктестік пен ашықтықтың нәтижесі. Университет жаңа жобаларға дайын және технология мен білімнің күшіне сенетін барлық серіктестерге есігін айқара ашық ұстауда», — деп қорытындылады Ербол Исақаев.