Гүлзат Қобенова Kozybayev University халықаралық жобаларымен танысты
Қазақстан Республикасы Ғылым және жоғары білім вице-министрі Гүлзат Қобенова Kozybayev University-ге барып, университеттің инфрақұрылымымен танысты, стратегиялық халықаралық жобалардың барысын бағалап, студенттермен кездесу өткізді, деп хабарлайды QZ NEWS оқу орнының баспасөз қызметіне сілтеме жасап.
Кездесуге «Серпін» бағдарламасының студенттері, АҚШ-тың Аризона университетімен қос диплом бағдарламасы бойынша білім алып жүрген жастар, сондай-ақ академиялық ұтқырлық аясында келген Қытайдың 29 студенті қатысты.
Гүлзат Қобенова Kozybayev University-ді халықаралық интеграциядағы «алғашқы қарлығаш» деп атады.
«Бүгінде бүкіл ел осы жобаның нәтижесі қандай болатынын күтіп отыр. Биылғы оқу жылында алғашқы бірлескен түлек болмақ. Жоба әрі қарай да кеңейеді деп үміттенемін. Басқа бағыттар бойынша да әріптестік қарқынды дамып келеді. Қытайлық әріптестермен байланыстың нығайып жатқанын көргеніме қуаныштымын. Осы алты айда ҚХР студенттері мұнда құнды білім алғанына сенемін. Қазақстан оларда зор қызығушылық тудырғанына қуаныштымын. Болашақта олар Қазақстан мен Қытай арасындағы «көпірге» айналуы мүмкін», – деді Гүлзат Қобенова.
Вице-министр сондай-ақ заманауи зертханалық кешенмен және университет ғалымдары жүзеге асырып жатқан 20 ғылыми жобамен танысты. Ғылыми зерттеулер аймақтың азық-түлік қауіпсіздігі мен су ресурстары саласындағы өзекті мәселелерді шешуге бағытталған.
Сапар соңында Гүлзат Қобенова 500 студент пен 34 жұмыс беруші қатысқан бос орындар жәрмеңкесіне барды. Университеттің белсенді жұмысының арқасында Kozybayev University түлектерінің жұмысқа орналасу деңгейі 81%-ға жеткен.