Костенко шахтасында апаттық-құтқару жұмысы жалғасуда
Қарағандыдағы Костенко шахтасындағы апаттық-құтқару жұмыстары жалғасуда, деп хабарлайды QZ MEDIA тілшісі Хабар 24 арнасына сілтеме жасап.
Соңғы мәліметтер бойынша, 45 адамның денесі табылды. Тағы біреуін іздеу жалғасуда. Тау-кен құтқарушылары кезең-кезеңімен жұмыс істеуде. Шахта жұмыстарының алғашқысы құтқару мүмкіндігі бар кеншілерді табуға бағытталған. Ендігі кезекте барлық қаза тапқан кеншілердің денелерін жер бетіне шығару үшін қайталама сараптама жүргізіледі.
Бұл ретте тау-кен құтқарушылары жарылыстан зақымданған тау-кен техникасын бөлшектеуде. Ал мамандар төтенше жағдай аймақтарының қауіпсіз екеніне көз жеткізгеннен кейін ғана тергеу жүргізіп жатқан мемлекеттік комиссия мүшелері ол жаққа бара алады.
«Лаваларды мүлдем су баспаған, лавалар қалыпты түрде желдетіледі. Су басқан кеніштердің белгілі бір учаскелері бар. Біз шахтадағы газ жағдайын бақылап болған соң, енді сорғылар орнату және осы аумақтардан суды сору үшін шахта мамандарын тарту мәселесін шешеміз», – деді Республикалық орталық штабы кәсіби әскерилендірілген авариялық-құтқару қызметтері филиалы директорының орынбасары Геннадий Силинский.
Сондай-ақ, Костенко шахтасында жарақат алған екі кеншінің жақын арада ауруханадан шығуға дайындалып жатқаны белгілі.
Денсаулық сақтау басқармасы түскен 24 науқастың барлығы қажетті диагностикалық тексерулер мен ем-дом алып жатқанын атап өтті. Кеншілер токсикологиялық уланумен, сынықтармен, миы шайқалып, түрлі жарақаттармен Қарағанды және Шахтинск қалаларының ауруханаларына түскен.
Өңірде медициналық көмек көрсету үшін барлық мамандандырылған қызметтер тартылып, дәрігерлер травматология және ортопедия, нейрохирургия ғылыми орталығының республикалық мамандарымен кеңесіп, облыстық штаттан тыс қызметкерлер де жұмылдырылған.
Оқиға орнында барлығы 21 адам мен 7 жедел медициналық техника жұмыс істеуде. Сонымен қатар, Төтенше жағдайлар министрлігі мен Қарағанды облысының Төтенше жағдайлар департаментінде жедел штабтар жұмыс істейді. Қаза болған кеншілердің туыстарымен психологтар және жедел жәрдем дәрігерлерінен құралған бірнеше бригада жұмыс істеп жатыр.