Жеті партия – ортақ мақсат: СҚО-дағы партия филиалдарының негізгі жұмыс бағыттары
Еліміздің саяси өміріндегі маңызды тарихи оқиғалардың бірі – Құрылтай депутаттарының сайлауына үш аптаға жуық уақыт қалды. Қазақстан заң шығарушы биліктің жаңартылған моделіне көшіп, бір палаталы өкілді органды қалыптастыруда. Жаңа Конституцияға сәйкес, Құрылтай заң қабылдау, мемлекеттік бюджетті бекіту, Үкімет қызметін бақылау және мемлекеттің даму бағытын айқындайтын маңызды шешімдерді қабылдау өкілеттігіне ие болады. 23 тамыз күні өтетін дауыс беру барысында қазақстандықтар алғаш рет жаңа органның 145 депутатын сайлайды. Бұл мандаттар үшін ресми тіркелген жеті саяси партия өзара бәсекеге түсуде. Сайлау қарсаңында Солтүстік Қазақстан облысындағы барлық партиялардың өңірлік филиалдары да белсенді жұмыс жүргізіп жатыр, деп хабарлайды QZ NEWS тілшісі.
«Әділет» партиясы
2026 жылы тіркелген саяси кеңістіктегі ең жас партиялардың бірі – «Әділет» партиясы заң үстемдігін қамтамасыз ету, мемлекеттік басқаруды жетілдіру және азаматтардың құқықтық сауаттылығын арттыру мәселелеріне басымдық береді. Партия өкілдері қала және аудан тұрғындарымен кездесулер өткізіп, «Жастар рухы» жастар қозғалысының қатысуымен түсіндіру жұмыстарын жүргізуде.
Жалпыұлттық социал-демократиялық партия (ЖСДП)
Жалпыұлттық социал-демократиялық партия әлеуметтік саясатты жетілдіруге, құқықтық институттарды дамытуға және азаматтардың мүдделерін қорғауға ерекше көңіл бөледі. Өңірлік филиал өкілдері қоғамдық талқылаулар ұйымдастырып, облыс аудандарында көшпелі кездесулер өткізуде.
«Байтақ» жасылдар партиясы
«Байтақ» партиясының филиалы қоршаған ортаны қорғау, экологиялық қауіпсіздік және табиғи ресурстарды ұтымды пайдалану бағытында жұмыс істейді. Партия жастарға арналған ағартушылық жобаларды жүзеге асырып, өңірде экологиялық мәдениетті қалыптастыруға бағытталған акциялар ұйымдастыруда.
Қазақстан Халық партиясы (ҚХП)
Қазақстан Халық партиясы әлеуметтік сала, денсаулық сақтау, білім беру және еңбек қатынастары мәселелері бойынша жүйелі жұмысын жалғастыруда. Өңірлік филиал ардагерлермен, еңбек ұжымдарымен және жастармен тығыз байланыс орнатқан. Партия құрамында әйелдер және жастар қанаты жұмыс істейді.
«Ауыл» халықтық-демократиялық патриоттық партиясы
Аграрлық өңірдің ерекшелігіне сәйкес, «Ауыл» партиясы ауылдық аумақтарды дамытуға, агроөнеркәсіп кешенін қолдауға және ауыл инфрақұрылымын жетілдіруге басымдық береді. Партия жанынан «Мейірім құшағы» отбасы мәселелері жөніндегі комиссиясы мен «Ауыл жастары» жастар бірлестігі құрылған.
«Ақ жол» Қазақстан демократиялық партиясы
«Ақ жол» демократиялық партиясының өңірлік филиалы экономиканы дамытуға, шағын және орта бизнесті қолдауға, сондай-ақ кәсіпкерлер мен мемлекет арасындағы тиімді диалогты нығайтуға бағытталған жұмыстар жүргізуде. Партия құрылымында әйелдер қанаты да белсенді қызмет атқарады.
Respublica партиясы
Respublica партиясының Солтүстік Қазақстан облыстық филиалы заманауи технологияларды дамытуға, кәсіпкерлікті қолдауға, білім беру мен адами капиталды нығайтуға ерекше мән береді. Өңірде партияның Re:woman әйелдер қауымдастығы мен Re.jastary жастар қозғалысы белсенді жұмыс істеп келеді.