Қалалық мәдениет үйінің экс-директоры мен оның сыбайластары бюджет қаржысын жымқырды деген айыппен бас бостандығынан айырылды

Петропавл қалалық соты мәдениет үйінің экс-директоры, ішкі аудит басқармасының заңгері және жауапкершілігі шектеулі серіктестік басшысына қатысты қылмыстық істі қарады. Оларға бюджет қаржысын жымқырды деген айып тағылды. Сондай-ақ, мәдениет үйінің ғимаратында жөндеу жұмыстарын жүргізу үшін директорға пара берген кәсіпкер айыптылар орындығында отырды, деп хабарлайды QZ Media тілшісі.

2022 жылдың қазан айында мәдениет үйінің экс-директоры Ішкі мемлекеттік аудит департаментінің заңгерімен бірлесіп, мәдениет үйінің акт залында жөндеу жұмыстарын жүргізу құқығын алған тұлғаны орнынан алып тастаған. Осыдан кейін олар жұмысты жүргізу үшін басқа компанияның басшысымен заңсыз келісімге келген.

«Жұмыс көлемін көрсетілгеннен аз орындап, «К» серіктестігінің директоры, заңгер және басшы бюджет қаражатын ұрлап, мемлекетке 7 миллион теңгеден астам шығын келтірген. Сонымен қатар, мәдениет үйінің директоры жеке кәсіпкер «П»-дан жұмыстың аяқталғаны туралы актілерге қол қойып, сахналық қойылымдарды безендіру бойынша қызмет көрсету шартын жасағаны үшін 454 000 теңге көлемінде пара алған. Прокурор сотталушыларды мемлекеттік қызметте жұмыс атқару құқығынан өмір бойына айыра отырып, бас бостандығынан айыруды сұрады. Айыпталушылар өз кінәларын мойындамады. Алайда, олардың кінәсі куәлар мен сарапшылардың айғақтарымен, жазбаша дәлелдемелермен дәлелденді», – делінген облыстық соттың хабарламасында.

Нәтижесінде экс-директор 4 жылға бас бостандығынан айырылды. Бір кәмелетке толмаған және үш кішкентай баланың болуына байланысты сот үкімнің орындалуын 5 жыл мерзімге кейінге қалдырды. Заңгер 4 жылға бас бостандығынан айырылды, ЖШС басшысы 3 жылға бас бостандығынан айырылды, ал ДК директорына пара берген кәсіпкер параның 25 еселенген мөлшерінде айыппұл арқалады, бұл 11 350 000 теңгеге сәйкес келеді. Сотталғандар жазасын қауіпсіздігі орташа мекемеде өтейтін болады.

Соттың үкімі заңды күшіне енген жоқ.