Петропавлда тұрмыстық зорлық-зомбылықтан зардап шеккен әйелдерге арналған дағдарыс орталығы ашылды

Петропавлда өмірлік қиын жағдайға тап болған әйелдер мен балаларға уақытша баспана беріп, жан-жақты көмек көрсететін жаңа дағдарыс орталығы жұмысын бастады. 50 төсек-орынға арналған мекеме Солтүстік Қазақстан облысының барлық аудандарынан келген әйелдерді қабылдауға дайын, деп хабарлайды QZ NEWS.

Орталықты ашуға облыстық бюджеттен шамамен 172 миллион теңге бөлінді. Нысан отбасын қорғау және тұрмыстық зорлық-зомбылыққа тап болған әйелдерді қолдау жөніндегі өңірлік жүйенің маңызды бөлігіне айналмақ. Мұнда Петропавл тұрғындарымен қатар, облыстың ауылдық жерлерінде тұратын әйелдер де көмек ала алады.

Мекемеде жайлы тұруға және оңалтуға барлық жағдай жасалған. Зардап шеккен әйелдер балаларымен бірге мұнда алты айға дейін бола алады. Тұрғындарға кәсіби психолог, әлеуметтік педагог, медицина қызметкері және балаларға қарайтын тәрбиеші көмек көрсетеді. Мамандардың жұмысына арналған жеке кабинеттер қарастырылған. Сонымен қатар отбасылар үшін асхана, демалыс орындары, ойын алаңы және балалармен жұмыс істеуге арналған арнайы бөлме жабдықталған.

Орталықта болған уақыт ішінде мамандар әйелдерге білікті психологиялық көмек көрсетіп, құқықтық және әлеуметтік мәселелерін шешуге, құжаттарын қалпына келтіруге және өзге де қиындықтарды еңсеруге жәрдемдеседі.

«Тұрмыстық зорлық-зомбылыққа тап болған әйелдердің мәселесін естіп, түсінеміз. Олар үшін қауіпсіз орын мен білікті көмек алу мүмкіндігінің қаншалықты маңызды екенін білеміз. Сондықтан осындай орталық ашу туралы шешім қабылданды», – деді Петропавл қаласы әкімінің орынбасары Айнұр Шаймерденова.

Жаңа мекеме әйелдерге уақытша баспана беріп қана қоймай, дағдарысты еңсеріп, өмірін қайта бастауына қажетті қауіпсіз әрі қолайлы орта қалыптастырады.