Қызылжар ауданындағы Якорь мектебінде алғашқы агросынып ашылды
Қызылжар ауданының оқушылары ауыл шаруашылығымен енді тек оқулық арқылы ғана емес, практикалық сабақтар, зерттеу жобалары және сала өкілдерімен кездесулер арқылы да таныса алады. Аграрлық білім берудің жаңа бағыты Якорь орта мектебінде іске қосылды. Мұнда мамандандырылған агросынып ашылды, деп хабарлайды QZ NEWS тілшісі.
Ауыл мектептерінде балаларға оқуын аяқтамай тұрып, болашақ мамандығын таңдауға көмектесу мәселесіне ерекше назар аударылып келеді. Оның бір жолы – оқушыларды аграрлық саламен мектеп қабырғасында таныстыру. Жобаны ұйымдастырушылар дәл осы мақсатты көздейді. Бастама білім беру мекемелерін, ғалымдар мен ауыл шаруашылығы өндірушілерін біріктірді.
Агросыныптың ашылу рәсімінде қонақтар оқушылардың атқарып жатқан жұмыстарымен танысты. Оларға мектеп мұражайының экспозициясы, интерактивті оқу материалдары мен балалардың зерттеу жұмыстары таныстырылды. Сондай-ақ агросыныптардың қызмет бағыттары туралы айтылды. Мұндай сыныптар Якорь мектебімен қатар Вагулин орта мектебі мен Бескөлдегі №2 орта мектепте де ашылып жатыр.
Жоба білім беру саласының экономиканың нақты секторымен тығыз байланысын көздейді. Оқушылар ауыл шаруашылығындағы заманауи тәсілдермен танысып, сұранысқа ие мамандықтар туралы біледі. Сондай-ақ осы салада жұмыс істеу үшін қандай білім қажет екенін түсінеді.
«Аграрлық білім беру тек теориямен шектелмеуі керек. Балалардың ғылым мен алған білімнің тәжірибеде қалай қолданылатынын көруге, мектеп пәндерінің болашақ мамандықпен байланысын сезінуге мүмкіндігі болғаны маңызды», – деген ұстаным кездесудің негізгі идеяларының біріне айналды.
Әріптестікті дамытудың нақты қадамы ретінде ынтымақтастық туралы меморандумға қол қойылды. Құжатқа Қызылжар ауданының әкімдігі, СҚО білім басқармасы, Kozybayev University, Солтүстік Қазақстан ауыл шаруашылығы ғылыми-зерттеу институты және «Фирма «Алекри» ЖШС қол қойды.
Іс-шара ашық химия сабағымен аяқталды. Жаңа кабинеттегі сабақты мұғалім Замира Шакирова өткізді. Осылайша аграрлық бағытпен танысу мектептегі кәдімгі пәннен басталды. Бұл пән бойынша алған білім ауыл шаруашылығы ғылымында да, өндірісте де қажет болуы мүмкін.
Мұндай сыныптардың басты мақсаты – ауыл оқушыларына туған өңірінде кәсіби тұрғыдан дамуға мүмкіндік бар екенін көрсету. Бүгінгі оқушылардың бірі агросыныппен танысуды агроном, технолог немесе зерттеуші мамандығына бастар алғашқы қадам ретінде қабылдауы мүмкін.