Мамандардың болжамынша, Сергеев су қоймасының бөгеті арқылы су ағуы екі метрге жетуі мүмкін

Петропавл қаласында СҚО ТЖД брифингінде өңірдегі су тасқыны жағдайы туралы айтылды, деп хабарлайды QZ NEWS тілшісі.

Өңірдегі ахуал туралы СҚО ТЖД төтенше жағдайлардың алдын алу басқармасының бастығы, азаматтық қорғау подполковнигі Әсет Шайкин баяндады. Оның айтуынша, қазіргі таңда облыстағы су тасқыны штаттық режимде өтуде.

«Облыс аумағында су тасқыны жағдайы бақылауда және қалыпты түрде өтіп жатыр. Құқық қорғау органдары мен жергілікті атқарушы органдардың барлық күштері мен құралдары дайындық режимінде», — деді спикер.

20 наурызда Уәлиханов ауданының су басу қаупі жоғары Қулы-Көл және Қаратал ауылдарына жинақталған жасақ жіберілген. Сонымен қатар өңірге Алматы облысынан ТЖМ №28237 әскери бөлімінің әскери қызметшілері келді. Жалпы саны 100 адам және 8 бірлік техника Қызылжар ауданы мен Петропавл қаласы арасында бөлінген. Мамандар инертті материалдар дайындап, қорғаныс құрылыстарын нығайтуда. Атап айтқанда, Боголюбово ауылында қорғаныс жабындарын төсеу жұмыстары жүргізілді. Ауа температурасының көтерілуіне байланысты облыста қардың еру үдерісі күшейді. Бұл өз кезегінде жыралардың пайда болуына және өзендердегі су деңгейінің біртіндеп көтерілуіне әсер етті.

Асет Шайкиннің айтуынша, Сергеев су қоймасында бұған дейін су деңгейі бөгет қырынан 138 сантиметрден 27 сантиметрге дейін төмендеген, алайда еріген судың келуінің артуына байланысты аздаған өсім тіркелген.
Тәулік бойы жұмыс істейтін су тасқынына қарсы штаб құрылған. Оның құрамына полиция департаменті, жол қызметтері және облыстық басқармалардың өкілдері кіреді. Барлық қызметтер жедел әрекет етуге әрдайым дайын. Қазіргі уақытта Тайынша ауданында, Аққұдық ауылы маңында КАЗ-16 «Көкшетау – Кішкенекөл – Бидайық» республикалық маңызы бар автожолында судың бір рет тасып өту фактісі тіркелген.

«Алғашында су тасқыны шамамен 200 метр аумақты қамтып, биіктігі 10 сантиметр болған. Таңертеңгі жағдай бойынша оның ұзындығы 50 метрге дейін қысқарды. Қарқыны төмендеуде», — деп нақтылады спикер.

Оқиға орнында жол қызметтері, ТЖМ қызметкерлері және полиция жұмыс істеуде, тәулік бойы бекеттер қойылған. ТЖД өкілінің айтуынша, тұрғындардың қозғалысына қауіп жоқ, жол жабынының жағдайы қанағаттанарлық деп бағалануда.

Жалпы облыс бойынша 112 елді мекен қауіп аймағында: оның 38-і өзен деңгейінің көтерілуіне байланысты, 12-сі көлдердің тасуына, ал 60-ы еріген судың келуіне байланысты. Қар қоры ең көп оңтүстік-батыс аудандарда сақталған.

Спикер су тасқынының шарықтау шегінің нақты уақытын айту мүмкін еместігін атап өтті, өйткені жағдай тікелей ауа райына байланысты.
Тұрақты оң температураның, оның ішінде түнгі уақытта да сақталуы қардың жылдам еруіне ықпал етеді.

«Қазгидромет» деректеріне сәйкес, алдағы аптада автожолдардың жекелеген учаскелерін су басу қаупі сақталады. Барлық қызметтер кезекшілікті жалғастырып, жедел әрекет етуге дайын. Болжам бойынша, Сергеев су қоймасына келетін су көлемі шамамен 2,6 млрд текше метрді құрауы мүмкін, бұл 2019–2020 жылдардағы деңгейге сәйкес келеді. Гидротораптағы су ағуы екі метрге дейін жетуі ықтимал.

«Бұл аса қауіпті көрсеткіштер емес. Өткен жылдарға талдау жасай отырып, Есіл өзенінің жайылмасындағы, Заречный кенті маңындағы саяжай қоғамдарын су басу ықтималдығы бар екенін айтуға болады», — деді Әсет Шайкин.

Сонымен қатар ТЖД өкілі қорғаныс бөгеттерін салу бойынша жүргізілген жұмыстардың арқасында тұрғын үйлерге қауіп төнбейтінін атап өтті.

«Қар қорының молдығына және қарқынды еруіне қарамастан, біздің басты міндетіміз — тұрғын үйлерді су басуға жол бермеу. Бұл үшін барлық қажетті шаралар қабылданды», — деп қорытындылады ол.

Өңірдегі су тасқыны жағдайы төтенше қызметтердің тұрақты бақылауында.