«Құқықтық дәріхана» акциясы: СҚО прокуратура қызметкерлері сауда үйлері мен ХҚКО-да азаматтарды апта сайын қабылдауды жалғастыруда

Петропавл қаласы мен Солтүстік Қазақстан облысы аудандарының прокуратура қызметкерлері кезекті «Құқықтық дәріхана» акциясын өткізді. Мобильді құқықтық көмек пункттері өңірдің халық көп шоғырланатын қоғамдық орындарында орналастырылды, деп хабарлайды QZ NEWS тілшісі.

Акция аясында Есіл ауданының тұрғынына тұрғылықты жері бойынша тіркелу және уақытша болу тәртібі түсіндірілді. Ақжар ауданында өтініш берушіге жеке басын куәландыратын жоғалған құжаттарды қалпына келтіру алгоритмі жан-жақты баяндалды.

Ең жедел жұмыс Қызылжар ауданында атқарылды. Мұнда жергілікті тұрғын жәрдемақы алу мәселесі бойынша жүгінген. Қадағалау органының қызметкерлері сол жерде қажетті құжаттарды жинауға көмектесіп, оларды төлем тағайындау үшін аудандық жұмыспен қамту бөліміне жолдады. Сол уақытта Айыртау ауданында ауыл тұрғынына тұрғын үй салу үшін жер учаскесін беру тәртібі бойынша заңнама түсіндірілді.

«Жалпы, осы акция барысында «Құқықтық дәріханаға» әртүрлі құқықтық мәселелер бойынша 132 тұрғын жүгінді. Жыл басынан бері өңір прокурорлары осындай 18 қабылдау өткізіп, нәтижесінде 1000-нан астам азамат білікті құқықтық көмек алды», – деп атап өтті қадағалау органы.

Еске салайық, «Құқықтық дәріхана» әр сейсенбі сайын азаматтарды қабылдайды. Петропавлда заңгерлер «Рахмет» сауда үйінде кезекшілік атқарса, аудан орталықтарында мобильді пункттер ірі сауда орталықтарында, ХҚКО-ларда, мәдениет үйлерінде және аудандық ауруханаларда орналасады.