СҚО-да ауылдық денсаулық сақтау саласын дамыту жұмысы күшейтіледі

Солтүстік Қазақстан облысында өткен әкімдік отырысында өңірдің денсаулық сақтау жүйесіне қатысты мәселелер талқыланды. Аймақ басшысы Ғауез Нұрмұхамбетов бұл саладағы жұмысты, әсіресе ауылдық жерлерде дамытуға ерекше назар аударды, деп хабарлайды QZ News тілшісі.

Өңірде денсаулық сақтау жүйесін жаңғырту қарқынды жүргізілуде. Мемлекет басшысының тапсырмасы бойынша салаға цифрлық технологиялар енгізілуде. Соңғы екі жыл ішінде Солтүстік Қазақстан облысында 60 медициналық ұйым жаңғыртылды, 32 нысанда жөндеу жұмыстары жүргізілді. Сонымен қатар 600-ден астам заманауи медициналық жабдық сатып алынды.

Ауылдық жерлерге де ерекше көңіл бөлініп отыр. Өңірде медициналық инфрақұрылым нығайтылуда — ауылдарда 46 жаңа денсаулық сақтау нысаны ашылды. Алайда, Ғауез Нұрмұхамбетов атап өткендей, бұл бағыттағы жұмысты одан әрі күшейту қажет. Жыл соңына дейін санитарлық автокөлік паркі 21 жаңа көлікпен толықтырылады деп жоспарлануда.

«Өңірдің агроқұрылымдарын бұл процеске белсендірек тарту маңызды. Ауыл шаруашылығы өндірушілерінің өз қаржысын ауылдарды, соның ішінде денсаулық сақтау саласын дамытуға бағыттаған оң мысалдары бар. Биылғы жылдың соңына дейін 21 санитарлық көлік сатып алынады, бірақ бұл жеткіліксіз. Келесі жылдың соңына дейін санитарлық автокөлікке деген қажеттілікті толық жабу қажет», – деді облыс әкімі.